Сергей Лушчан: "Менга биринчи 45 дақиқалик кўпроқ ёқди"

Ўзбекистон Суперлигасининг 11-туридан ўрин олган “Навбаҳор” – “Қўқон-1912” (3:0) жамоалари ўртасидаги учрашувдан кейинги матбуот анжуманининг иккинчи қисмида мезбонлар бош мураббийи Сергей Лушан иштирок этиб, ОАВ ходимларининг саволларига жавоб берди. 
Клуб матбуот хизматининг ёзишича, “Лочинлар” устози одатдагидек, ўз сўзини ўйин ҳақидаги фикрлари билан бошлади.

- Бугунги баҳсда ғалаба қозонганимиздан хурсандман. Учрашувни икки бўлимга бўладиган бўлсак, менга биринчи 45 дақиқалик кўпроқ ёқди. Танаффусгача йигитлар ҳимоя ва ҳужумда жуда яхши ҳаракат қилишди. Биринчи бўлимда яна 2 та гол уришишимиз мумкин эди. Танаффусдан кейин бироз хотиржамликка берилдик. Албатта, рақиб ҳам ноқулай. Жорий мавсумда жамоалар, масалан, 7 йил олдингидек, ўйинлар намойиш этишмаяпти. Олдинлари бундай ранг-баранглик йўқ, кўп жамоалар бир хил услубда ўйнар эди. Бу йил эса ҳар бир жамоа сюрприз тақдим этмоқда. Рақибнинг ўйинини қанчалик ўргансанг ҳам, беллашувларда ўйлаган режанг амалга ошмай қоляпти. Таъкидлаганимдек, “Қўқон-1912” ноқулай ва вертикаль футбол ўйнайдиган жамоа. Биринчи бўлимда йигитлар бир нечта вазиятлар яратишди, аммо уларнинг барчасидан фойдалана олишмади. Шунга қарамай ғалаба қозондик, демак, ҳаммаси яхши ва бунинг учун шогирдларимга миннатдорчилик билдираман ҳамда учрашув натижаси ва ўйиндан қониқиш ҳосил қилдим. 
Бугун Наманганда анъанавий “Гуллар байрами”нинг очилиш маросими бўлиб ўтди ва йигитлар мухлисларга икки баробар қувонч улашишди. Бу албатта биз учун ёқимли. Футболчилар ишқибозларга байрам уюштириб беришганидан жуда хурсандман.

- Бугун “Навбаҳор” клуби тарихидаги муҳим воқеа содир бўлди, яъни, клуб ўз академиясини ишга туширди. Шунга муносабат билдириб ўтсангиз...

- Ҳар бир бинонинг ўз пойдевори бўлиши керак. Мазкур масалада Наманган вилояти ҳокими билан кўп гаплашганман. Буни аллақачон амалга ошириш лозим эди. Лекин қандайдир сабабларга кўра, бу амалга ошмаётганди. “Навбаҳор” сингари ўз номига эга клуб ўз академиясига эга бўлганлиги муносабати билан Наманган шаҳри аҳолиси, клуб вакиллари ва мухлисларни табриклайман. Анъанага кўра, беш йилдан сўнг, академия тарбияланувчилари асосий жамоа таркибида пайдо бўлишади, деган умиддаман. 
Ўзингиз кўриб турибсиз, замонавий футбол бизнесга айланиб кетган. Клублар ўз тарбияланувчиларини сотиш орқали даромад қилишмоқда. Айрим клублар эса тарбияланувчиларнинг трансферларидан келиб тушган маблағлар эвазига фаолиятини давом эттириб келмоқда. Бунга мисоллар жуда кўп. Масалан, “Спортинг”. “Навбаҳор” ҳам шундай даражага етиб келади деган умиддаман. Жамоа бюджетининг бир қисмини бўлса ҳам қоплай олиши керак. 
Замонавий бизнесда барчаси маблағга бориб тақалади. Муҳими, ҳаммани сотиб юбориш эмас, балансни топа олиш. “Бунёдкор”даги фаолиятим ҳамда тажрибамдан келиб чиқиб, бу иш осон эмаслигини айта оламан. Намангандан, умуман олганда, Фарғона водийсидан энг яхши футболчилар етишиб чиқишган. Насиб қилса, академиямизда шуғулланадиган ёшлар келажакда муваффақиятли футболчи бўла олишади.