Шамсиев: "Амалдаги чемпион устидан ғалаба қозониш ҳаммага ҳам ёқади"

Ўзбекистон Суперлигаси 2023 йилги мавсум 1-туридан ўрин олган "Пахтакор" - "Олимпик" баҳси якунланди. Унда меҳмонлар 3:2 ҳисобида кучли рақибдан устун келди. 

"Олимпиячилар" сафида Жиянов, Одилов ҳамда Абдумажидов ўз номини таблога ёздириб қўйди. Ушбу голларга "шерлар" сафида Сайфиев ҳамда Турсунов жавоб бера олди. Мазкур баҳс якунида "Олимпик" аъзоси Бекзод Шамсиев журналистларнинг саволларига жавоб берди.

Мавсумнинг бошланиши, қийин бўлишини билардик! Рақибимиз "Пахтакор" амалдаги чемпион ҳисобланади. Асосийси, характер кўрсата олдик ва ўзимиз учун муҳим 3 очкони қўлга киритдик. Бугун барча йигитлар жон-жаҳди билан, бор кучи билан ҳаракат қилди. Ҳаммасига раҳмат.

Мавсумолди машғулотларда Тимур ака мени фақат чап қанот ҳимоясида ўйнатган эди. Аммо ҳозир мураббийим мана шу позицияда кўряпти. Мен универсал футболчиман. Ҳар қандай чизиқда ўзимни кўрсатишга ҳаракат қиламан.

Собиқ клубингизга қарши ғалаба ёқимлими?

Албатта, жуда ёқимли. Гап собиқ жамоамас, 15 карра чемпион, амалдаги ғолиб устидан ғалаба қозониш ҳаммага ёқади. Асосийси, 3 очко. Барча йигитлар, мураббийларни тарихий ғалаба билан табриклайман ва "Олимпик" тарихда биринчи маротаба "Пахтакор"ни ютганини эслатиб ўтмоқчиман.

Ҳали чемпион бўлишга эрта. Лекин ҳар битта баҳсни ютишни мақсад қилганмиз. Ҳар бир ўйиндан 3 очко олишга ҳаракат қиламиз.