«Шахтёр» - «Базель»: Превью

Афиша жиҳатидан чорак финалнинг энг пастки ўринда дея таъкидланаётган ўйини нейтрал футбол ихлосмандларига қизиқарли тўқнашувни тақдим қила олади. Бир тарафдан қуръа ҳам ушбу учрашувнинг томошабинлар эътиборидан четда қолишига сабабчи бўлиб қолди. Сабаби, нариги тарафда 1/4 финалнинг энг марказий беллашуви турганда, фақат украин ва швецарлар ушбу учрашувга эътибор қаратади. Аммо аслини олиб қараганда тенг кучли икки жамоанинг ўйини қизиқарли тус олиши аниқ.

«Шахтёр»

Украинадаги Бразилия клуби нимчорак финалда «Вольфсбург»ни кўрдим демай ўтиб кетди. Жуниор Мораес эса учрашувни ўзининг бенефисига айлантириб юборди. Ички чемпионатдаги ғалабалар бу каби кучли таркиб билан одатий ҳол, албатта. Энди мухлислар «кончилар»дан халқаро майдондаги натижаларни кутишади. Европа Чемпионлар Лигасидаги иштирок доимий тарзда гуруҳ босқичида тугамоқда. Европа Лигасида ҳам катта ўйинларни донецкликлар соғиниб қолган. Чемпионликнинг қўлга киритилганига 11 йилдан ошди. Улар учун чорак финал мутлақ омадли босқич. Улар доим ушбу босқичдан ярим финалга ўтишни уддалаган. Сўнгги бор бу воқеа 2016 йилда «Прага» устидан қозонилган ўйиндан сўнг содир бўлганди.

Тахминий таркиб: Пьятов, Додо, Кривцов, Матвиенко, Болбат, Маркос Антонио, Степаненко, Алан Патрик, Марлос, Жуниор Мораэс, Тайсон.

Иштирок эта олмайди: Хочолова.

«Базель»

Швецария футболининг Европадаги тимсолига айланган клуб халқаро майдонда ички чемпионатдаги сингари қироллик мавқейида эмас. Аммо барибир еврокубокларда ўзининг доимий ўрнига эга клуб сифатида барчамизга яхши таниш. Очиғи, кўпинча айнан шу босқич улар учун сўнгги манзил бўлиб хизмат қилади.  Жамоа ўз тарихида бир мартагина турнир ярим финалига чиқа олган. Бугун ушбу ишни қайта такрорлаш учун улар 2 та энг қулай рақибнинг биттасига қарши майдонга тушади. Чемпионлик жуда қийин масала. Сабаби, кейинги босқичдаёқ «Интер» кутиб турибди. «Базель» клуби қуръаларда энг омадли жамоа бўлди. 1/16 финалда АПОЭЛ, нимчорак финалда «Айнтрахт» ва бугун «Шахтёр». «Копенгаген» уларни янада хушнуд этиши мумкин эди. Аммо шу ергача етиб келган жамоа энди рақиб танлаб ўтирмаслиги керак.

Тахминий таркиб: Николич, Видмер, Ван дер Вирф, Алдерете, Петретта, Жака, Фрай, Стоккер, Кампо, Пулулу, Кабраль.

Иштирок эта олмайди: Кўмерт, Омлин, Рамирес, Заффи.

Мураббийлар

Луиш Каштру: «Мен «Базель»ни ўта агрессив жамоа деб биламан. Ярим ҳимоя кучли футболчилар билан тўла: Фрай, Жака, Кампо ва бошқалар. Жамоа таркибида яна бир қатор позицияларда юқори савияли футболчилар бор. Биз ҳар тарафлама кучли жамоага қарши тўқнаш келамиз».

Марсель Коллер: «Миллий терма жамоани бошқариш тажрибам менга бу каби мусобақалар муҳитини яхши ўрганиб олишимга ёрдам берган. «Шахтёр»да бир қатор иқтидорли футболчилар бор. Уларнинг кучли жиҳатлари ўйин тақдирини белгилаб бериши мумкин. Битталик ўйин бўлгани учун бизда кейинги босқичга йўл олиш учун яхшироқ имконият мавжуд. Жамоалар бир-бирини у қадар яхши билмайди. Бу бизга катта ёрдам беришига умид қиламан».

Юқорида айтиб ўтганимиздек, ҳар иккала жамоа ҳам ўз мамлакатининг байроқдорларидан.  Еврокубокларда мунтазам иштирок этишларига қарамай, уларнинг йўллари жуда кам кесишади. Демакки, учрашувнинг дастлабки 10 дақиқаси ва балки ундан ҳам кўпроғи майдон марказидаги курашлар ва ўзаро ўрганишлар билан ўтади. Учрашув битта ўйиндан иборатлиги беллашувни янада шиддатли ўтишига ёрдам беради. Албатта, футбол жамоатчилигининг катта қисми «Шахтёр»нинг устунлигини таъкидламоқда. Бироқ 90 дақиқалик футболда барчаси юз бериши мумкин.

Абдулвосид Валихонов тайёрлади