Шахзод Убайдуллаев: "Бундай қийин пайтда "Металлург"ни ташлаб кетиб бўлмайди"

“Металлург” клуби мавсумнинг биринчи қисмини муваффақиятсиз ўтказди. 13 та ўйинда бекободликлар бирорта ҳам ғалаба қозона олмадилар. 7 дуранг ва 6 мағлубият қайд этдилар. Ҳолбуки, жамоа таркибида маҳоратли ижрочилар етарлича.

Масалан, “Металлург” ҳужумчиси Шахзод Убайдуллаевни ҳамма яхши билади. Унинг маҳоратига шубҳа йўқ. Бироқ у ҳам биринчи даврани кўнгилдагидек ўтказа олмади. Sports.uz журналисти Убайдуллаев билан суҳбатлашди.

-  Шахзод, биринчи даврадан кейин "Металлург"нинг натижалари жуда қониқарсиз бўлди. Сизнингча, жамоага нима бўлди ёки нима етишмади?

- Бизга биринчи даврада омад етишмади, деб ўйлайман. Чунки кўрган бўлсангиз, ҳар ўйинимизда голли имкониятларимиз кўп бўлди. Деярли 100 фоизли вазиятларга эга бўлдик. Аммо гол уролмадик. Ҳаммасининг сабаби омадсизлик, деб ҳисоблайман.

- "Металлург" биринчи даврадаги ўйини билан ғалабага қозонишга қодир эмасмиди? Рақиблар кучайиб кетганмиди? Бу хусусида фикрингиз қандай?

- Йўқ, биз ўйин томонлама ҳеч кимга ютқазмадик. Биргина “Олимпик” билан баҳсни ҳисобга олмасак, биринчи даврада ўйин жиҳатидан бошқалардан ортда қолмадик. Вазиятлардан фойдалана олмаганимиз, ҳимоядаги хатолар...Шунинг учун голлар ўтказиб юбордик. Яна қайтараман: биринчи даврада ўйин томонлама ҳеч кимга ютқазмадик.

- Веско Стешевичнинг кетиши ҳам вазиятни ижобий томонга ўзгартиргани йўқ. Сизнингча, бу нима билан боғлиқ?

- Айтиб ўтганимдек, бу омадсизлик. Ҳаммаси шу билан боғлиқ. Менинг фикрим шундай.

- Адашмасам, биринчи даврада чемпионатда 12 та учрашувда 2 та гол урдингиз. Нега кам?

- Бунга ҳеч қанақа сабаб йўқ. Чунки мен ҳар йили биринчи даврада энг кўпи билан 3 та гол урганман, холос. Иккинчи даврада “очилиб” кетганман. Бу йил ҳам насиб қилса шундай бўлади.

- Иккинчи даврани яна "Металлург"да давом эттирасизми ёки жамоанинг бундай салбий натижасидан кейин ўзингизни бошқа клубда синаб кўрмоқчимисиз?

- Албатта, “Металлург”да қоламан. Жамоа учун ёрдам бераман ва насиб қилса Суперлигада олиб қоламиз. Бундай қийин пайтда “Металлург”ни ташлаб кетиб бўлмайди.

- Иккинчи даврада вазият ўзгармаса "Металлург" про лигага тушиб кетади. Қандай ечим топмоқчисизлар?

- “Металлург” про лигага тушиб кетмайди. Турнир жадвалини кўряпсиз, ҳамма клублар бир-бирига жуда яқин. Кетма-кет 2-3 та ўйинда ютадиган бўлсангиз, саккизталикка кириб қоласиз. Фақат биз учун ҳар бир ўйин финалдек, худди олти очкодек. Иккинчи даврада Худо хоҳласа, ҳар бир учрашувга олти очкодек майдонга тушамиз.

- Охирги савол: Янги бош мураббий ҳаммани қизиқтиряпти. Қандай мураббий зарур деб ўйлайсиз?

- Ҳали янги мураббий тайинлангани йўқ. Бизга қанақа мураббий келиши қизиқ эмас. Яъни, жамоамизга қандай мураббий келган тақдирда ҳам у майдонга тушиб ўйнаб бермайди. Биз ўзимиз майдонда ҳаракат қилишимиз керак.

Шуҳратбек Жўраев.