Шайхлар таҳдид қилди: “Сити” жазоланса, Британия сармоясиз қолади

Бирлашган Араб Амирликлари «Манчестер Сити» молиявий қоидабузарликлар учун жазоланган тақдирда, Буюк Британия ҳукуматига мамлакат иқтисодиётига киритиладиган инвестицияларни жиддий равишда қисқартириш мумкинлигини билдирди.

Бундан аввал «Сити» Премьер-лиганинг мустақил комиссияси чиқарган айблов хулосаси юзасидан апелляция бергани маълум бўлган эди.

Бундан атиги бир неча ҳафта олдин «Сити» президенти Халдун Ал-Муборак Даунинг-стритга ташриф буюриб, тадбиркорлик, инновациялар, фан ва савдо вазири Жонатан Рейнольдс билан учрашган.

Ал-Муборак БААнинг Британия иқтисодиётига киритаётган жорий ва келгусидаги инвестицияларини муҳокама қилиш учун келган. «Сити» билан боғлиқ масала эса бу жараёнда муҳим ўрин тутмоқда.

БАА ва Буюк Британия ўртасидаги дипломатик муносабатлар «Сити» билан боғлиқ вазият туфайли анча кескинлашган. Британия ҳукуматига қўшма қиймати миллиардлаб фунт стерлингга тенг лойиҳалар тақдири хавф остида экани ҳақида огоҳлантириш берилган.

Bloomberg хабар беришича, ҳар икки томон ҳам «Сити» билан боғлиқ ишнинг шунчалик катта можарога айланганидан норози.

Қайд этиш жоиз, «Сити» шайх Мансур бошчилигидаги хусусий компанияга тегишли. Шайх Мансур Абу-Даби ҳукмрон оиласи аъзоси ва БАА вице-президенти ҳисобланади.