Sherzod Temirov Iroqdaги muvaffaqiyatli faoliyati, to‘purarligi, shartnomasi tugayotganи va boshqa mavzularda intervyu berdi

Ироқ юлдузлар лигасида “Эрбил” клуби шарафини ҳимоя қилаётган ҳамюртимиз Шерзод Темиров учун барчаси муваффақиятли кечмоқда.

27 ёшли ҳужумчимиз чемпионатда ҳозирга қадар 20 та ўйинда 16 та гол уришга эришди ва тўпурарлар пойгасида биринчи ўринда кетмоқда. Sports.uz журналисти эса Темиров билан боғланди.

- Шерзодбек, сизни Ироқдаги фаолиятингизни кузатиб боряпмиз ва муваффақиятли чиқаётгани билан табриклаймиз. Ҳозиргача 20 та ўйинда 16 та гол уришга эришдингиз. Бундай ижобий кўрсаткичларнинг сири нимада?

- Барча ўзбек мухлисларига ассалому алайкум. Ҳаммани муборак Рамазон ойи билан табриклайман. Худога шукр, Ироқдаги фаолиятим яхши кетяпти. Барча натижалар жамоамиз билан бирга ҳар бир ўйинда битта куч бўлиб курашаётганимиз,  деб ўйлайман.

- Ироқ чемпионатида яққол тўпурар бўлиб турибсиз. Асосий мақсадингиз ҳам тўпурарликни қўлга киритиш бўлса керак а?

- Худо хоҳласа, қўлдан келганича ҳаракат қиламан. Меҳнат, сабр ила кўрамиз. Ҳаммаси олдинда.

- Одатда, араб чемпионатларига келган легионерларнинг бунчалик мослашиб, яхши натижалар қайд этиши доим ҳам кузатилавермайди.  У ерда сизга мослашишингиз, қўллаб-қувватлашда кимлар асосий роль ўйнади?

- Тўғри, араб лигаларида мослашиш анча қийин. Ҳаракат қилса ҳамма нарсани имкони бор. Жамоамда муҳит яхши, жамоадошларимни яқиндан ёрдам беришгани бир тарафдан мослашиш учун катта роль ўйнади.

- У ерда сизга энг ёққан нарса нима бўлди?

- Лигани тезкорлиги ва курашувчан жамоалар кўплиги жуда ҳам ёқди.

- Нечта гол уришни режа қилгансиз?

- Ҳаммасини вақт кўрсатади. Насиб қилганича ҳаракатдамиз.

- Ироқда футболга муносабат ва эътибор қай даражада?

- Футбол учун ҳамма шароитлар яратилган. Бу ерда фақат футбол ўйнаш керак.

- Адашмасам, шу йилнинг июнь ойида шартномангиз тугайди. Режалар қандай? Клуб янги шартнома таклиф қиляптими ёки янги таклифлар борми?

- Ҳозир бор эътиборим жамоамда. Кўрамиз, қолганини вақт кўрсатади.

- Сизни муваффақиятли иштирокингиздан кейин Ироқда ўзбекистонлик футболчилар сони кўпая бошлади, шу фикрга қўшиласизми?

- Мен бундан жуда хурсандман. Қайсидир лигада кимдир сабаб ўзбек футболчиларини янада кўпроқ танитиш бу ажойиб. Президентимизга катта раҳмат айтиб қоламан. Спорт учун шундай шароитлар яратилгани учун миннатдормиз. Фақат тўғри мақсадларда фойдаланиб ўзбек байроғини юқорига кўтаришимиз керак, Худо хоҳласа.