Шомуродов энг зўр жамоада ўйнаётган экан...
Элдор Шомуродовнинг “Рома”си халқаро мусобақаларида энг зўр натижа қайд этиб келаётган Италиянинг энг яхши жамоаси ҳисобланар экан. Миллий чемпионат ва мамлакат кубогида анчадан бери юқори натижа кўрсата олмаётган римликларнинг кейинги беш йилликда халқаро кубок ўйинларидаги натижаларини бирорта итальян клуби қайд этгани йўқ, деб ёзмоқда IL Tempo.
“Рома” ўтган мавсумда Европа Лигасида ярим финалга қадар етиб борганди. Жорий мавсумда эса Конференциялар лигасининг чорак финалига чиқиш учун жуда яхши имкониятга эга. Жозе Моуриньо шогирдлари нимчорак финалнинг биринчи ўйинида Нидерландияда “Витесс”ни кичик ҳисобда ер тишлатиб қайтди.
Охирги беш йиллик таҳлилига “бўрилар”нинг 2017-2018 йилги мавсумда Европа Чемпионлар лигасида ярим финалгада ўйнагани ҳам тарихий натижа сифатида қайд этилган. Шуларни инобатга олиб, IL Tempo нашри мутахассисларни “Рома”ни Италия жамоалари ўртасидаги Европа майдонларида энг яхши кўрсаткич қайтган клуб сифатида эътироф этмоқда.
“Рома” сўнгги йилларда “Ювентус” ва “Наполи” қатори Еврокубокларнинг плей-офф босқичида иштирок этган. Икки мартадан ярим финал ва нимчорак финалларда қатнашган пойтахтликлар бу мавсумда ҳали қитъа миқёсидаги юришини тўхтатгани йўқ. “Рома” олдига Конференциялар лигасида бош совринни қўлга киритиш вазифаси турибди.
Бу кўрсаткичлар бўйича “Рома” ҳозирча “Ювентус”, “Милан”, “Лацио” ва “Наполи” каби клублардан олдинда экани айтилмоқда.
Бундан ташқари, Конференциялар лигасидаги иштирокини давом эттираётган жамоалар орасида “Рома” УЕФА рейтингида етакчи ҳисобланади.
Албатта, “Рома”нинг халқаро майдондаги муваффиқиятли юришида Элдор Шомуродовнинг ҳам ҳиссаси бор. Легионеримиз дебют мавсумида Конференциялар лигасида жами саккиз маротаба майдонга тушиб, битта гол ва иккита ассист қайд этган.
“Рома” тарихига назар ташласак, пойтахт клуби фаолияти давомида уч марта Италия чемпиони, 13 маротаба вице-чемпион, саккиз марта бронза медаль соҳиби бўлган.
Италия кубогидаги натижалари эса бироз яхшироқ. Римликлар жами 17 маротаба финалда тўп тепиб, шулардан тўққизтасида бош совринга эга чиққан.
“Рома” Италия суперкубогининг ҳал қилувчи баҳсида олти марта иштирок этиб, икки бор зафар қучган, тўрт маротаба совринни рақибга топширишга мажбур бўлган.
Моуриньонинг режаси ўхшади
“Рома” мутасаддилари бундан тўрт йил муқаддам Жозе Моуриньо эътиборига тушган сербиялик дарвозабон Миле Свиларни ўз сафига қўшиб олди.
Свилар 18 ёшидаёқ Чемпионлар лигасида Моуриньо бошқарувидаги “Манчестер Юнайтед”га қарши майдонга тушиб, Антони Марсьяль тепган пенальтини бартараф этган ва португалиялик мутахассиснинг рўйхатига тушган эди.
Свилар 2017 йилдан бери “Бенфика” шарафини ҳимоя қилиб келмоқда. Шу кунга қадар, жами 23 та учрашувда қатнашиб, ўз дарвозасидан 20 та тўп олиб чиққан. Табиийки, ёш посбон лиссабонликларнинг асосий дарвозабони ҳисобланмайди.
“Рома” Свиларни 33 ёшли Руй Патрисиога ўринбосар сифатида олиб келди. У билан тўрт йиллик битим имзоланди ва томонлар келишувига кўра, ҳамкорлик яна бир йилга узайтирилиши мумкин.
Истеъдодли дарвозабон мавсум охирида эркин агентга айланганидан кейин Рим клубига бепул кўчиб ўтади.
Моуриньо яна икки ўйинчини кутмоқда
“Рома” бош мураббийи Жозе Моуриньо ҳимоя чизиғини кучайтириш учун “Барселона” ва “Манчестер Юнайтед”дан ўйинчи олмоқчи.
“Барселона”дан ўйнаётган Сержиньо Дест жамоани Хави қабул қилиб олганидан кейин асосий таркибдаги жойини йўқотди. Каталонияликлар аввалги мураббий Рональд Куман танлаган ўйинчини ёзда сотиб юбориши кутиляпти.
“Рома” Дест атрофидаги вазиятни кузатиб бормоқда ва қулай фурсат келиши билан уни ўз сафига қўшиб олмоқчи.
Диогу Далот ҳам “Манчестер Юнайтед”нинг асосий таркибига киришга қийналяпти. Португалиялик ҳимоячи бошқа жамоага ўтишга қарши эмас. Ўтган мавсумда ижара асосида “Милан” шарафини ҳимоя қилган Далот бу гал “бўрилар” сафини тўлдирмоқчи.
Далот манчестерликлар сафидаги дастлабки учрашувларини айнан Жозе Моуриньо “Манчестер Юнайтед”ни бошқарган даврда ўтказди. 22 ёшли футболчи ўстози билан дўстона алоқаларни сақлаб қолган. Бу омил унинг “Рома”ни танлашида муҳим аҳамият касб этиши мумкин.
Фикрлар