Шомуродов Италияда, Ҳусанов Францияда. Бу футболчимиз Испанияда аниқ ўйнай олади...

Яқинда Аргентинада 20 ёшгача бўлган футболчилар ўртасида ўтказилган жаҳон чемпионатида Ўзбекистон терма жамоаси вакилларига Европа жамоалари эшигини очиб бермоқда.

Аргентинадаги мундиалда ўз салоҳияти ва маҳоратини намойиш қила олган ёш ўйинчиларимиз жиддий клублардан таклиф ола бошлади.

Хусусан, профессионал футболчилик фаолиятини Беларуснинг “Энергетик-БГУ” жамоасида ўтказиб келган Абдуқодир Ҳусанов терма жамоадаги ўйинлари туфайли кучли бешлик лигалари жамоалари эътиборига тушди. Охир-оқибат 19 ёшли футболчимиз фаолиятини Франция чемпионати вице-чемпиони “Ланс”да давом эттирадиган бўлди.

Ўзбекистон терма жамоасининг яна бир етакчиси – Аббосбек Файзуллаев Россиянинг ЦСКА клуби трансфер қилишни истаяпти. Томонлар бу трансфер бўйича музокаралар олиб борилаётганини тасдиқлади.

Айни пайтда Самарқанднинг “Динамо” жамоасини бошқараётган таниқли мураббий Вадим Абрамов Аббосбек Файзуллаевнинг имкониятларига баҳо берди.

- Файзуллаев жуда иқтидорли ва салоҳияти катта футболчи. Бўйи баланд эмас, лекин тезлиги ва дриблинги бор. Қўрқмай алдамчи ҳаракатларни амалга оширади, майдонда кутилмаган ва тўғри қарор қабул қилиш қобилияти билан ажралиб туради. Зўр футболчи бўлиб ўсиши учун барча сифатларга эга.

Россияда футбол жисмоний кучга асослангани эса, бошқа масала. Ҳаммаси унинг жамоадошлари қандай усулда ўйнаши ва бош мураббий Владимир Федотов унга қандай талаблар қўйишига боғлиқ бўлади.

Аббосбек Испания чемпионатида аниқ ўйнаб кетган бўларди. Лекин Россия ва ЦСКадаги фаолияти ўхшайдими, буни билмайман. Ҳатто, Месси ҳам ПСЖда бор имкониятини намойиш қила олмади. 20 ёшгача бўлган футболчилар иштирокидаги жаҳон чемпионати ЦСКАнинг қизиқишига сабаб бўлгани аниқ. Бу мусобақа кўрик вазифасини ўтайди ва ҳамма у ердаги  футболчиларни кузатади. Ҳимоячимих Абдуқодир Ҳусанов “Ланс”га ўтиб кетди. Терма жамоадаги муваффақиятли иштирок футболчиларга бўлган талабни оширади.

Агар Файзуллаев ЦСКАла ўйнаб кета олса, клуб Еврокубокларда ўйнамаса ҳам, Европага трансфер қилиш имкон бўлади. Россия чемпионати ҳам жуда яхши афиша. Ўйлашимча, Европа селекционерлари  Россия Премьер-лигаси учрашувларини кузатиб боради. Ҳар қанақасига олиб қарасак, Россиянинг ўзи ҳам Европа.

Элдор Шомуродов “Ростов” билан Еврокубокларда ўйнамаган, лекин “Рома”га ўтдику. Агар Файзуллаев ҳам ўзини яхши томондан кўрсата олса, у ҳам кетади.

Дарвоқе, бир неча кундан кейин Самарқанднинг “Динамо” жамоаси Ўзбекистон кубоги доирасида Аббосбек ўйнайдиган “Пахтакор”га қарши ўйин ўтказади. Ҳозир мен Файзуллаев Россияга кетмасидан бўлажак баҳсда унга қарши самарали ўйин услубини топишим керак, - деди Вадим Абрамов “ВсёПроСпорт” нашри журналисти Даниил Бороздинга берган интервьюсида.

19 ёшли Аббосбек Файзуллаев “Пахтакор” клуби тарбияланувчиси ҳисобланади. Истеъдодли футболчи 2021 йилнинг бошида асосий таркибга қабул қилинган.

Аббосбек шу пайтга қадар клублар миқёсида Ўзбекистон Суперлигасида жами 33 та учрашувда қатнашиб, рақиблар дарвозасини етти маротаба ишғол қилган ва уч марта жамоадошларига голли рас узатган.

Шунингдек, Файзуллаев Осиё чемпионлар лигасида бешта баҳсд майдонга тушиб, ўз номига битта гол расмийлаштирган.

Ўзбекистон кубоги мусобақасида 19 ёшли футболчи учта ўйинда икки бор гол уришга муваффақ бўлгани қайд этилган.

Аббосбек Файзуллаев бир неча позицияда тўп тепа олади. Асосий амплуаси ўнг қанот ҳужумкор футболчиси бўлишига қарамай, қарама-қарши қанотда ва майдон марказида ҳам ишончли ўйин намойиш қилади.

Истеъдодли ҳужумкор фуболчимиз 2023 йилнинг июнь ойидан Ўзбекистон миллий терма жамоасига жалб қилина бошлади. Ҳозирча, Файзуллаев учта учрашувда қатнашиб, ўз ҳисобига битта гол ёздириб қўйди.

“Ланс” Ҳусановга асосий таркибдан жой очяпти

Шомуродовни қўллаб-қувватлашмади!