“Ланс” Ҳусановга асосий таркибдан жой очяпти

Ўзбекистон миллий терма жамоаси марказий ҳимоячиси Абдуқодир Ҳусановни қўлга киритган Франция вице-чемпиони “Ланс” тез орада етакчи ҳимоячиси Кевин Дансони сотиб юборишга қарор қилди.

Ҳусанов француз клубига ўтганидан кейин ушбу мамлакат футболини кузатиб бораётган аксарият экспертлар ўзбек футболчиси “Ланс” ҳимояси  етакчиси Кевин Дансога муносиб ўринбосар бўлиши мумкинлигини билдирганди.

Амалда шундай бўлиб чиқадиган кўринади. “Ланс” раҳбарияти австриялик ҳимоячи трансфери бўйича Италия чемпиони “Наполи” билан музокара олиб бормоқда.

Таниқли журналист Санти Унанинг ёзишича, неаполликлар 24 ёшли футболчи учун дастлабки расмий таклифни юборган. Унга кўра, чемпион жамоа Франция вице-чемпионига 22 миллион евро таклиф қилди.

Манбанинг таъкидлашча, “Ланс” бу таклифни қабул қилмаган. Улар ўз ҳимоячисини камида 30 миллион еврога баҳоламоқда. Айни пайтда “Наполи” Кевин Дансо номзодидан воз кечгани йўқ. Улар музокараларни давом эттирмоқда ва тез орада навбатдаги таклифни тайёрлайди.

“Наполи” мураббийлар штаби Дансони “Бавария”га ўтиб кетган осиёлик футболчи Ким Мин Джэга муносиб ўринбосар сифатида жамоага олиб келишни истаяпти.

Дансонинг ўзи “Ланс”дан кетишга шошилмаётган бўлса-да, “Наполи” билан шахсий шартнома бўйича келишиб бўлган. Унга кўра, австриялик ўйинчи Неаполь клубида тўрт мавсум ўйнаши ва йилига 3 миллион евродан маош олиши белгиланган.

Кевин Дансо Англиянинг “Рединг”, “МК Донс” ва Германиянинг “Аугсбург” жамоалари тарбияланувчиси ҳисобланади. Профессионал фаолиятини 2017 йили “Аугсбург”да бошлаган. Кейинчалик Англиянинг “Саутгемптон” ва Германиянинг “Фартуна” клубларида ижара асосида тўп тепган.

“Ланс” вакиллари 2021 йилнинг ёзида истеъдодли ҳимоячини  “Аугсбург”дан 5,5 миллион евро эвазига харид қилди.    

Кевин Дансо Англия чемпионатида олтита учрашув ўтказган. Бундеслигада 41 маротаба майдонга тушиб, ўз ҳисобига учта гол ва иккита ассист расмийлаштирган. Франция чемпионатида эса, жами 70 та беллашувда қатнашди. Бу ўйинларда ҳимоядаги вазифасини бажаришдан ташқари, рақиблар дарвозасини уч маротаба ишғол қилиб, жамоадошларига олтита голли пас узатди.

Дансо 15 ёшидан бошлаб, Австриянинг барча ёшдаги терма жамоаларида асосий ўйинчилардан бўлган. Миллий терма жамоадаги фаолиятини олти йил муқаддам бошлаган ҳимоячи шу пайтга қадар 13 маротаба ўйин ўтказди.

“Ланс” Дансо билан 2026 йилнинг ярмигача давом этадиган шартномага эга. Шунга қарамай, французлар бу ўйинчини мўмай пулга сотиб юбориб, ўрнига Абдуқодир Ҳусановни ўйнатишни ражелаштирмоқда.

Франция вице-чемпиони Абдуқодир Ҳусанов трансфери учун Булераснинг “Энергетик-БГУ” клуби учун 100 минг евро тўлади. “Ланс” 25-рақамни танлаган ўзбек футболчиси билан тўрт йил давом этадиган битим тузган.

Шомуродовни қўллаб-қувватлашмади!