Шомуродов жамоаси

Кучли бешлик чемпионатлари ўзининг қизғин палласига кириб бормоқда. Баъзи жамоалар ғолиблик учун отни қамчилаб қолиши зарур бўлган палла етиб келаётганини ҳис этиб, тезликни ошириш ҳаракатини бошлаб юборган. Ўтган сафарги мақоламизда таъкидлаб ўтган маълумот бу сафар ўзгарди. Яъни, топ-5 чемпионатларнинг амалдаги ғолиблари секин-аста пешқадамликни қўлга ола бошлади. Биринчи бўлиб бу ишни "Ливерпуль" уддалаб, карвонбошиликни "Тоттенхэм"дан тортиб олди. Шунингдек, муҳим учрашувни ўз фойдасига ҳал этган "Реал" ҳам ўзидан юқоридаги икки жамоа билан бир хил очко тўплаб, кучли учликка кирди. Қуйида бу тур кучли бешлик чемпионатларида бўлиб ўтган энг муҳим беллашувлар ҳақида тўхталамиз:

photo_2020-12-19_15-46-36

"Вулверхэмптон" - "Челси" 2:1

"Вулвс"нинг ажойиб одати бор: ўз уйида исталган жамоани анчайин тер тўкишга мажбур қила олади. Айниқса, ўша меҳмон гранд клуб бўлса. "Molinex stadium"га келган ҳар бир клубнинг тиззаси қалтираши ҳеч кимга сир эмас. Бежиз уларга "бўрилар" лақаби берилмаган. Бу сафар "оч бўрилар" қароргоҳига Лондондан меҳмонлар ташриф буюрди. Дарғазаб "Вулверхэмптон"га дуч келган "аристократлар" кетма-кет иккинчи ўйин мағлубиятга учрашига тўғри келди. 1 тур аввал "Эвертон"дан енгилган Лэмпард шогирдлари бу сафар "Вулвс" олдида ожиз қолди. Ўйинни ёмон ўтказмаган "кўклар" биринчи бўлиб ҳисобни очишга ҳам муваффақ бўлганди. Иккинчи бўлимнинг дастлабки дақиқаларида Чилуэлл томонидан чап қанотда рейд уюштирилди. Марказга оширилган тўпга Оливье Жиру ноқулай позицияда турганига қарамай, аниқ зарба бера олди. Патрисиу ўзига келаётган тўпни қайтара олмади. Орадан кўп вақт ўтмай, Фабио Сильва мувозанатни тиклади. Бироқ ҳакам ўйиндан ташқари ҳолат туфайли голни бекор қилди. Гол ҳидини олган "бўрилар" ҳужумга ўтишда давом этди ва бу 66-дақиқада ҳисобни ҳақиқатан тенглашишига олиб келди. Жарима майдонида икки рақибини чалғитган Поденсе яқин бурчакни ишғол этди. Ўйин тенг курашлар остида давом этаётган, учрашув дуранг билан якунланиши кутилаётган бир пайтда, Педру Нету катта саҳнага чиқди. Қарши ҳужумга ўтган португалиялик футболчи Менди қўриқлаётган дарвозага тўп йўллаб, жамоасининг ғалабасини таъминлади. "Кўклар"да кетма-кет иккинчи мағлубият ва 7-ўрингача пастлаш. "Челси"да нимадир ўзгариши зарур. Акс ҳолда, мавсум аввалида жамоани кучайтириш учун миллионлардан воз кечган клуб президенти Лэмпардни ишдан бўшатиб юбориши ҳеч гап эмас.

photo_2020-12-16_02-07-55

"Лестер" - "Эвертон" 0:2

Карло Анчелоттининг "Эвертон"даги ишлари жойида. Италиялик мутахассис шу вақтгача "Милан"дан бошқа ҳеч қайси жамоада икки йилдан ортиқ ишламаган. Мерсисайд клубида эса, унинг ишлари яхши ва маълумотларга кўра, "Карло ота" "ирисчилар" билан амалдаги шартномасини узайтирмоқчи. Бунда АПЛ сўнгги туридан ўрин олган "Лестер"га қарши ғалабанинг ҳам катта ўрни бор. Турнир жадвалида кучли учликда бораётган "тулкилар"да юқоридаги икки жамоа ўртасидаги ўзаро ўйиндан унумли фойдаланиб, карвонбошига айланиб олиш имконияти бор эди. Бироқ ўйин меҳмонларнинг фаол ҳужумлари билан бошланди. Хавфли бўлмаган вазиятда тўпни қабул қилган Ришарлисон марказга юрди ва дарвозага зарба йўллади. Тўп рикошет натижасида Шмейхель кутмаган йўналишни олди ва дарвозадан жой олди. Кичик фаворит сифатида эътироф этилган "Лестер" буни ҳазм қила олмади ва тартибсиз олдинга ўтишда давом этди. Рожерс шогирдларининг аксарият ҳужуми рақиб жарима майдонига қадар етиб бормади. Буни бутун ўйин давомида меҳмонлар дарвозаси томон берилган атиги 2 тагина аниқ зарбадан ҳам англаш қийин эмас. Назоратни рақибга топшириб, ўзи куч йиққан "ирисчилар" бу сафар стандарт вазиятни голга айлантирди. Бурчакдан оширилган тўп Кин томонидан дарвозага йўлланди, дарвозабон қайтарган тўпга Кальверт-Льюин зарба берди. Яна даниялик посбон тўп йўлига ғов бўлди. Аммо воқеалар марказида пайдо бўлган Холгейт бўш қолган дарвозага тўп киритди. Қизиғи, ўша вазиятда "Лестер" ҳимоячилари голни катта қизиқиш билан жуда қулай ракурсдан кузатишди.

photo_2020-12-17_17-10-59

"Ливерпуль" - "Тоттенхэм" 2:1

Марказий учрашувга ҳам етиб келдик. Премьер-лига бу мавсум чемпионлигига асосий даъвогарлар тўқнашуви барча учун бирдек қизиқ бўлиши шубҳасиз. Энг муҳими, бу баҳс пешқадам номига аниқлик киритиб бериши кутилганди. Юқори темпда кетаётган Моуриньо шогирдларига қарши секин-аста тикланаётган Клопп армияси. Бир неча тур олдин Гвардиола жамоаси устидан ҳимояда етарлича ишончли ҳаракат қилиб, ҳужумлардан максимал фойда чиқариб, ғалаба қозонган “шпорлар” бу сафар мерсисайдликларни ҳам ҳудди шу йўл билан маҳв этмоқчи бўлди. Бироқ “қизиллар” бироз омадлироқ бўлиб чиқди. Омад факторини бежиз келтирмадик: ўйинни ким устунлик билан бошлаши ва ҳаттоки, ким ҳужумда ўтказиши ўйин олдидан барчага маълум эди. Ишончни оқлаган ҳолда, тинмай ҳужумлар уюштирган “Ливерпуль” дастлабки дақиқалардан бир неча аниқ зарбалар берди. Бироқ 26-дақиқагача дарвоза томон йўлланган барча зарба Льорис томонидан бартараф этилаётганди. Мезбонлар етакчиси Муҳаммад Салаҳнинг жарима майдони ичидан берган кучли зарбаси эса, аввал ҳимоячиларга, сўнг устунга тегиб, дарвозадан жой олди. Тўп йўналиши бу тарзда ўзгаришини кутмаган дарвозабон ушбу вазиятда жамоаси учун ҳеч нима қилиб бера олмади. Орадан кўп вақт ўтмай, “осиёлик ракета” катта саҳнага чиқди. Тўғри позиция танлаб, ҳимоячини тезликда ортда қолдирган Сон Алиссонни ҳам ожиз қолдирди. Ўйин шу тарзда давом этаётган бир пайтда, Фирминонинг ҳужумчилиги ёдига тушиб қолди чоғи, рақиб жарима майдонида ҳимоячилар тақибидан усталик билан қочиб, бурчакдан етказиб берилган тўпни дарвозага жойлаб қўйди. Демак, “қизиллар”нинг ғалабага бўлган иштиёқи кўпроқлиги туфайли, улар ғалабани нишонлади ва турнир жадвалида карвонбошиликни “Тоттенхэм”дан тортиб олди.

photo_2020-12-17_13-16-18

"Шеффилд" - МЮ 2:3

Бир қарашда катта афишага эга бўлмаган ўйин. Сабаби, 12-турга келиб атиги 1 очко тўплаган "Шеффилд" ўтган мавсум амалга оширган ишлари шунчаки сенсация бўлганини тан олишга мажбур бўлмоқда. "Қизил иблислар" қандай ҳолатда бўлишидан қатъи назар, исталган рақибга муаммо туғдиришга қодир. Шунга қарамай, "Брэмолл Лейн" стадионида кечган баҳс анча шиддатли ва икки томоннинг ҳужумлари билан ўтди. Дастлабки дақиқалардан олдинга ўтган майдон эгалари тезкор гол киритишга ҳам муваффақ бўлди. Эрта прессинг уюштирган Оливер Берк дарвозабонни хато қилишга мажбур этди ва шеригини бўш қолган дарвоза қаршисида тўп билан таъминлади. Дэвид МакГолдрик вазиятдан унумли фойдаланди. Ушбу голдан ғазабланган манкунияликлар ташаббусни қайтариб олди ва танаффусгача Рэшфорд ҳамда Марсьялнинг голлари эвазига ҳисобда олдинга чиқиб олган ҳолда йўл олишди. Иккинчи қирқ беш дақиқаликда ҳам рақибдан бироз хавфлироқ ҳужумлар қилган меҳмонлар уюштирган ажойиб комбинацияни яна Рэшфорд гол билан якунлади. Ўйин темпи бироз пасайган, баҳс шу кўринишда тугаши кутилаётган бир пақтда, "Шеффилд" бурчакдан тўпни ўйинга киритди. Жарима майдони ичида МЮ ҳимоячиси Линделёф тўпни қайтаришга ҳаракат қилди. Бироқ унинг зарбасидан кейин тўп МакГолдрикнинг бошига тегиб, дарвозадан жой олди. Ҳаммаси шундан кейин бошланди: тинмай ҳужумлар уюштириб, рақибни жарима майдонига қамаган мезбонлар ҳисобни тенглаштиришига бир баҳя қолди. Бироқ Лис Муссенинг кучли зарбасини Дин Хендерсон қайтаришга эришди. Шу тариқа, ёш посбон биринчи голдаги хатосини тўғирлади ва энг муҳими, жамоасига ғалаба келтирди.

photo_2020-12-18_01-33-15

"Реал" - "Атлетик" 3:1

"Реал" Ла Лига дебютантидан мағлуб бўлиши, Чемпионлар Лигасида аутсайдерлар олдида ожиз қолиши мумкин. Бироқ ўзи учун муҳим деб билан ўйинларга катта эътибор қаратади ва шу сабабли, уларнинг аксариятида рақибга имконият қолдирмайди. Сўнгги тўрт баҳсда "Севилья", "Боруссия" Мюнхенгладбах, "Атлетико" каби жамоалардан бирорта гол ўтказмай устун келган "қаймоқранглилар" бу сафар "Атлетик" устидан зафар қучди. Бунга бир томондан 13-дақиқада меҳмонлар футболчиси Рауль Гарсиянинг майдондан четлатилиши ҳам сабаб бўлди. Кроосга нисбатан икки вазиятда қўполлик ишлатган испаниялик футболчи жамоасига панд бериб қўйди. Сондаги устунлик секин-аста сифатга ҳам таъсир эта бошлади ва бу мадридликларнинг ҳужумларида кўзга ташлана бошлади. Ниҳоят, биринчи таймга қўшиб берилган дақиқаларда Тони Кроос ўз услубида зарба бериб, жамоасини танаффусга яхши кайфиятда чиқиб кетишини таъминлади. Узоқ масофадан йўлланган "пушка" ва Унаи Симон тўпга улгурмади. Иккинчи бўлимда меҳмонлар "Реал" ҳимоясидаги камчиликларни яна бир марта кўрсатиб берди. Андер Капа Рамос бўш қолдирган ҳудуддан жарима майдонига ёриб кирди ва зарба берди. Тўпни қайтарган Куртуа такрорий зарба олдида ожиз қолди. Бу вазиятда на Рамос, на Варан рақибни зарарсизлантира олмади. Бироқ ғалабa учун кўпроқ интилган "қаймоқранглилар" барибир ўз мақсадига етди. Бензема аввалига бош билан йўллаган зарбаси орқали ҳисобни жамоаси томонга ўзгартирган бўлса, кейинчалик тўпни ўткир бурчакка аниқ йўналтириб, жамоадошларига ишонч бағишлади. Шу тариқа, "қироллик клуби" турнир жадвалида очколар бўйича пешқадамларга етиб олди. Зиданни ким ҳайдамоқчи эди?!

15273696538179

"Барселона" - "Реал Сосьедад" 2:1

"Кўк-анорранглилар"нинг ҳам умумий ҳолати азалий рақиб "Реал"никига ўхшаб кетади. Ҳимоядаги муаммолар, вазиятлардан фойдалана олмаслик. Бироқ яхши хабарлар ҳам йўқ эмас. Каталонияликлар ўз ўйинини тобора топиб бормоқда ва бу натижаларда ҳам ўз аксини топяпти. Ла Лига карвонбошиси сифатида "Камп Ноу"га етиб келган сан-себастьянликлар биринчи бўлиб гол урди. Қисқа паслар билан Тер Штеген дарвозаси қаршисига етиб келган меҳмонлар Виллиан Хосенинг аниқ зарбаси эвазига ҳисобни очди. Аммо бу ҳолат шундоқ ҳам ҳужумда омади юришмаётган Куман шогирдларини баттар ғазаблантирди. Буни майдондаги ҳаракатларга ҳам кўчира олган "кўк-анорранглилар" дарҳол тарози паллаларини тенглаштиришга эришди. Альбанинг узоқ бурчакка йўллаган зарбасини дарвозабон қайтара олмади. Голдан руҳланган каталонияликлар ҳужумлар уюштиришда давом этди ва ҳақли тарзда, ҳисобда олдинга чиқиб олди. Хорди Альба бу сафар ассист ролида. Испаниялик шеригининг қулай узатмасига оҳиста теккан Де Йонг жамоасини ҳисобда олдинга олиб чиқди. Томонлар қанча ҳаракат қилмасин, ўша куни таблодаги ҳисоб бошқа ўзгармади.

photo_2020-12-17_01-57-43

"Ювентус" - "Аталанта" 1:1

Бу мавсум ўзига ўхшамаётган ҳар икки клуб ўзаро ўйинни "ёндириб" берди. Ҳужумчиларнинг кетма-кет зарбалари дарвозабонлар томонидан катта қийинчилик билан бартараф этилди. Шу жумладан, пенальти ҳам. Ўзининг сўнгги 4 голининг барчасини 11 метрлик жарима зарбасидан киритган Криштиану Роналду Пьерлуижи Голлини олдида ожиз қолди. 25 ёшли посбон "Юве" етакчиси тепган пенальтини шунчаки қайтармади. Балки уни ушлаб олди ва жамоадошларига катта ишонч тақдим этди. Бироқ унинг дарвозаси ўша куни ишғол этилмай қолмади. Федерико Кьезанинг узоқ масофадан юқори бурчакка йўллаган зарбасини Голлини қайтаришга ожизлик қилди. Тасодифни қаранг-ки, қарама-қарши томондаги дарвозани қўриқлаётган Шенсний ҳам яқин масофадан йўлланган тўпларни бирин-кетин қайтарса-да, жарима майдони ташқарисидан Ремо Фройлер тепган тўп "кекса сеньора"ни ғалабадан мосуво этди.

IMG_20201219_153728_510

"Женоа" - "Милан" 2:2

Шомуродов ўзини кўрсатишни бошлади! Роландо Маран уни ўйинга тушириш қарори тўғрилигига тобора ишонч ҳосил қилиб бормоқда. Шу сабабли, италиялик мутахассис пешқадамга қарши асосий таркибда легионеримизни майдонга ташлади. Ўйин "россонерилар"нинг бутунлай устунлиги остида кечиши тахмин қилинган бўлса-да, аслида бундай бўлмади. Қизиғи, генуяликлар биринчи бўлиб ҳисобни очишга ҳам муваффақ бўлди. Гольданиганинг қанотдан оширган тўпини бир ҳаракат билан ўзига бўйсундирган Элдор дарвоза томон кучли зарба берди. Катта қийинчилик билан тўпни қайтарган Доннарумма такрорий зарба олдида ожиз қолди. Бироқ орадан 5 дақиқа ўтиб, мезбонлар умуман кераксиз вазиятда ўз дарвозасидан гол ўтказиб юборди. Калабриянинг тахминан 25 метр масофадан берган зарбасини Перин ўтказиб юборди. Очко олиши шарт бўлган Шомуродов жамоадошлари олдинга ўтишда давом этди ва яна марказга узатма ва иккинчи марта Маттиа Дестро катта саҳнага чиқди. Дарвозабон бу сафар ҳам унинг зарбасини қайтара олмади. Ўйиннинг 1 соат вақти ортда қолган бир пайтда 2:1 ҳисобида ғалаба қозонаётган генуяликлар катта эътиборни ҳимояга қаратди ва бунинг учун жазоланди. Хаугенинг зарбасини бир амаллаб зарарсизлантирган мезбонлар Пьер Калулуни тўхтатиб қололмади. Шу тариқа, Шомуродов жамоаси пешқадам билан ўйинда дурангга имзо чекди.

IMG_20201219_153714

Жавоҳир Азимов тайёрлади

Матнда хатолик топсангиз, ўша хатони белгилаб, бизга жўнатинг (Ctrl + Enter)