Шомуродов ўзи учун муҳим учрашувда ўйнайди!

Ўзбекистон миллий терма жамоаси 20 ноябрь куни Тошкентдаги “Пахтакор” стадионида Россия футболчиларига қарши илк маротаба ўртоқлик учрашувини ўтказади. Бўлажак беллашувга қизиқиш катта.

Россиялик футбол ишқибозлари ва мутахассислари бугунги кундаги энг машҳур футболчимиз Элдор Шомуродовнинг Россия терма жамоасига қарши бўладиган баҳсда иштирок этишини кутмоқда. Россия журналистлари бу ҳақда футболчимизнинг агентларидан бири Қаҳор Мўминовга мурожаат қилди.

- Элдор Шомуродов Россия терма жамоасига қарши ўйнайдими ва Валерий Карпин билан учрашадими? Албатта, шундай қилади, бу ажойиб-ку, - деди Қаҳҳор Мўминов.

Россия миллий терма жамоасига бош мураббийлик қилаётган Валерий Карпин бир пайтнинг ўзида “Ростов”ни ҳам бошқармоқда. Бу мутахассис Элдор Шомуродовнинг устози ҳисобланади.

Ҳамюртимиз Италияга кетишидан олдин уч йил давомида Россия премьер-лигасида Валерий Карпин қўл остида “Ростов” шарафини ҳимоя қилган. Мутахассислар россиялик мураббий ўзбек ҳужумчисининг янги қарраларини оча олганини ва уни Европа футболида ўзини кўрсата оладиган юқори савияли форвард қилиб тарбиялай олганини алоҳида таъкидлашади.

Бундан ташқари, Валерий Карпин ўз жамоаси учун муҳим паллада Элдор Шомуродовнинг трансферига тўсқинлик қилмасдан, ҳамюртимизни “Женоа” жамоасига қўйиб юборгани ҳам мутахассислар ва мухлислар томонидан жуда яхши қабул қилинди.

Шомуродов “Ростов” таркибида 2017-2020 йиллар давомида ўйнаб, Россия премьер-лигасида 80 та учрашувда 16 та тўп киритган ва жамоадошларига 10 та голли пас узатган. Шунингдек, ҳамюртимиз Европа лигаси саралаш баҳсида “Маккаби Хайфа” клуби дарвозасини ҳам ишғол қилган. Россия кубогида ўн марта майдонга тушиб, битта гол ва иккита ассист муаллифи бўлган.

Умуман олганда, Элдор Шомуродов клублар миқёсида ўзи иштирок этган барча турнирларда ўз ҳисобига гол ёздириб қўйишга муваффақ бўлган. Хусусан, “Машаъл” тарбияланувчиси “Бунёдкор”да ўйнаган даврида Ўзбекистон Суперлигаси ва Осиё чемпионлар лигасида ўз ҳисобига бир нечта гол ва ассистларни расмийлаштирган.

“Женоа” ва “Рома” ўйинчиси сифатида А Серия, Италия кубоги, УЕФА Конференциялар лигаси, Европа лигаси мусобақаларида рақиблар дарвозасини ишғол қилишга муваффақ бўлган.

Элдор Шомуродов бугунги кунда Ўзбекистон миллий терма жамоасининг сардори ҳисобланади. Трансферларга ихтисослашган www.transfermarkt.world сайтида қайд этилишича, 27 ёшли ҳужумчимиз мамлакатимиз бош жамоаси сафида 57 та баҳсда майдонга тушиб, ўз ҳисобига 31 та гол ёздириб қўйган.

Статистика мутахассислар Шомуродов тез орада Ўзбекистон миллий терма жамоаси тарихида энг зўр тўпурарга айланишини таъкидламоқда. Ҳозирча, Элдор терма жамоамиз тўпурари Максим Шацкихдан учта тўпга ортда қолмоқда. Айни пайтда “Пахтакор”га бош мураббийлик қилаётган Шацких футболчилик даврида Ўзбекистон термаси сафида рақиблар дарвозасини 34 маротаба ишғол қилган.

Демак, 20 ноябрь куни Тошкентда Россия терма жамоаси билан бўладиган халқаро ўртоқлик ўйинида Элдор Шомуродовни кутиб қоламиз.

Шомуродов “Интер” ёки “Ювентус”га ўтиши керак!

Европада Шомуродовга ов бошланди!

Моуриньо “Рома” ҳужумчиларини кескин танқид қилди, энди Шомуродовга ўйин бериш керакдир?

Легионеримиз Россияга қарши ўйинга муносабат билдирди

Легионеримизнинг голи рекорд ўрнатди, медални нақд қилди ва чемпионлик имкониятини сақлаб қолди!

Моуриньо Абрахамдан Шомуродовнинг ишини такрорлашни талаб қилди!

Легионер ҳужумчимизнинг келажаги мавҳум бўлиб қолди!