Shomurodov – eng qimmat futbolchi!
Transferlarga ixtisoslashgan www.transfermarkt.de sayti Markaziy Osiyo mamlakatlarining eng qimmat futbolchilarini aniqladi.
Mazkur sayt transfer summasini 6,5 million evroga baholagan “Jenoa”ning o‘zbekistonlik hujumchisi Eldor Shomurodov mintaqaning eng qimmat futbolchisi hisoblanadi. Amalda esa, uning “Rostov”dan “Jenoa”ga o‘tishi uchun genuyaliklar turli bonuslar bilan birga 9 million evro atrofida mablag‘ sarflagan.
Qozog‘iston milliy terma jamoasi va Moskvaning TsSKA klubi yarim himoyachisi Baxtiyor Zaynutdinovning transfer summasi 3,5 million evroni tashkil qilmoqda. Asli millati o‘zbek bo‘lgan bu futbolchi o‘z vaqtida Eldor Shomurodov bilan birga rostovliklar sharafini himoya qilgan.
Rossiya Milliy futbol ligasi vakili “Enisey” jamoasi himoyachisi Valeriy Kichin Qirg‘izistonning eng qimmat o‘yinchisi hisoblanadi va sayt mutaxassislari uning transferini 800 ming evroga baholagan. Bolgariyaning “Lokomotiv” klubi va Tojikiston terma jamoasi o‘yinchisi Parvizjon Umarboev transferining summasi 600 mingni tashkil qilmoqda.
Shuningdek, Bahraynning “Al-Muharraq”ning turkmanistonlik legioneri Ruslan Mingazov va Polshaning “Lexiya”sida o‘ynayotgan afg‘onistonlik Omran Haydariy 500 ming evro bilan o‘z mamlakatining eng qimmatbaho futbolchisi bo‘lib turibdi.
Fikrlar