Шомуродовдан енгилган ҳужумчи “Реал”да Бензема ўрнини босади!

“Реал” бош мураббийи Карло Анчелотти “Рома”дан ижарадан қайтган Борха Майорални жамоанинг асосий тўпурари Карим Бенземага ўринбосар сифатида ўйнатмоқчи.

“Қироллик клуби” тарбияланувчиси бўлган Майораль аслида мавсум охирида “Рома” томонидан трансфер қилиниши кутилганди. Бироқ, ўтган йили Рим жамоаси бош мураббийига айланган Жозе Моуриньога испан ҳужумчисининг ҳаракатлари маъқул келмади.

Майораль ички рақобатда Тэмми Абрахам ва Элдор Шомуродовга имкониятни бой берганидан кейин римликлар январда уни “Хетафе”га ижарага жўнатди.

Энди Майораль яна Мадридга келди ва янги мавсумни “Реал”да бошлайди.

Бу ўйинчи “Реал”даги дебютини 2015 йилда нишонлаган бўлса-да, асосий таркибга кира олмаганидан турли жамоаларда ижарада ўйнашга мажбур бўлган.