Шомуродовга “Рома”ни Европа лигасига олиб чиқиш имкони берилади!

Бошида “Рома” учун омадсиз кўринган 37-тур, барча ўйинлар ўтказилганидан кейин жуда муваффақиятли бўлиб чиқди.

Жозе Моуриньо шогирдлари ўз майдонида чемпионат аутсайдери “Венеция”ни енга олмаганидан кейин Европа лигасига чиқиш имконияти худди шу мақсад учун курашаётган жамоаларга боғлиқ бўлиб қолганди.

“Венеция”га қарши баҳсда Элдор Шомуродов жамоасига бир очко олиб берди ва умумий баллар сони 60 тага етди. Омадни қарангки, Европа лигасининг икки йўлланмасини Рим клуби билан талашаётгар учта жамоа ҳам очко йўқотди.

Римликлардан битта юқорида турган “Лацио” сафарда “Ювентус” билан дуранг ўйнаб, 63 очко билан бешинчи ўринда қолди. “Рома”ни таъқиб этаётган ва бир очко км жамғарган “Фиорентина” ва “Аталанта” пойтахт клубидан ўзиб кетишни уддалай олмади. “Аталанта” меҳмонда чемпионликка бир қадам қолган “Милан”га 2:0 ҳисобида ютқазганини тушиниш мумкин. Лекин “Фиорентина”нинг мусобақа жадвалининг қуйи қисмида  жойлашган “Сампдория”га 1:4 ҳисобида мағлуб бўлгани кутилмаган ҳолат.

Хуллас, сўнгги 38-тур олдидан ҳаммаси “Рома”нинг ўзига боғлиқ бўлиб турибди. Жозе Моуриньо шогирдлари Туринда “Торино”га қарши бўладиган баҳсда ғалаба қозонса, Европа лигаси йўлланмасини нақд қилади.

Аслида, одатга кўра, сўнгги тур баҳслари бир пайтда ўтказилиши керак эди. Лекин Рим клуби А Серия раҳбариятидан жамоа 25 май куни Конференциялар лигаси финалида Албаниянинг Тирана шаҳрида Нидерландиянинг “Фейеноорд” жамоасига қарши оғир ўйин ўтказишини инобатга олиб, чемпионат ўйини вақтини олдинроққа суришни сўради.

Лига раҳбарияти Европа миқёсидаги халқаро турнирда финалга чиққан ягона Италия клубининг талабини қўллаб-қувватлади. Натижада “Торино”га қарши ўйин икки кун олдинга сурилиб, 20 майга кўчирилди.

 Жозе Моуриньо бошчилигидаги мураббийлар штаби ўйиндан уч кун олдин тайёргарликни бошлаб юборди.

Corriere dello Sport нашрининг хабар беришича, португалиялик мутахассис Конференциялар лигаси финалига пухта тайёргарлик кўриш учун “Торино” билан бўладиган ўйинда бир неча етакчи ўйинчиларга дам берадиган бўлди.

Чунки, Моуриньо “Рома”даги биринчи совринини қўлга киритиш учун Тиранадаги финалга тўлиқ жанговар таркиб билан бормоқчи.

Италия футболига ихтисослашган яна бир нашр –  footballnews24.it  сайтининг маълумотига кўра, Моуриньо жамоа сардори Лоренцо Пеллегрини ва ҳимоячилар етакчиси Крис Смоллингни Туриндаги ўйинга жалб қилмайди. Улар 25 май куни асосий фигурага айланиши керак.

Ёш ўйинчи Никола Залевски ўрнига бошланғич таркибдан Леонардо Спинаццола ўрин олиши кутиляпти.

Кейинги ўйинларда римликларнинг асосий тўпурари Тэмми Абрахамнинг толиқиб қолаётгани сезилаётган эди. Мураббийлар штаби унга ҳам дам беришни режалаштиргани айтилмоқда.

Манбаларнинг таъкидлашича,”Торино”га қарши тўқнашувда ҳужум марказида Элдор Шомуродов тўп тепиши режалаштирмоқда. Олдинги чизиқда унга Николо Дзаьоло ва Феликс Афена-Гьян ёрдам беради.

Римликлар Туриндан ғалаба билан қайтса, Европа лигаси йўлланмасини нақд қилади. Агар бу миссия хшамай қолса, Шомуродов жамоасида яна бир имконият бўлади. Чунки УЕФА қоидасига кўра, Конференциялар лигасида ғолиб чиққан жамоага келаси мавсумда Европа лигасида қатнашиш ҳуқуқи берилади.

Шундай экан, Элдор Шомуродовда ўзи учун кутилган даражада омадли чиқмаган мавсумни муваффақиятли даврга айлантириб юбориш имконияти бор.

"Олимпико"даги сўнгги голни урган Шомуродовнинг ўйини қандай баҳоланди?

Легионеримиз ўзига Европанинг кучли лигаларига йўл очмоқда!

“Рома”нинг пўстагини қоқамиз!

Легионеримиз: Мураббий мен билан гаплашмай қўйди!

Шомуродов, энди сенга янада қийин бўлади!