Shomurodovga superklubdan qachon joy ochiladi?
Italiya A Seriyasini muntazam kuzatib borayotgan futbol muxlislari e’tiborini bir faktga qaratgan bo‘lsa, ajab emas. O‘ziga xos xususiyatlarga ega bo‘lgan italyan futbolida etakchi jamoalarning g‘alabalariga katta hissa qo‘shayotgan hujumkor futbolchilarning aksariyati yoshi o‘tib borayotgan “qariyalardir”.
Shuningdek, A Seriyada Mustaqil Davlatlar Hamdo‘stligi mamlakatlaridan etishib chiqqan bir necha futbolchi to‘p suradi. Xususan, armanistonlik Genrix Mxitaryan, rossiyalik Aleksey Miranchuk, ukrainalik Ruslan Malinovskiy va o‘zbekistonlik Eldor Shomurodovning nomini keltirish mumkin.
Bular orasida Italiyada eng ko‘p gol urayotgan o‘yinchi Genrix Mxitaryandir. Katta klublar maktabini o‘tagan bu futbolchi “Roma” o‘yiniga juda mos tushdi. Arman yigiti joriy mavsumda ettita gol urib, sakkizta golli pas oshirdi. Qizig‘i shundaki, 32 yoshli yarim himoyachi grand klublarda to‘purarlik qilayotgan futbolchilar orasida eng yoshlaridan biri hisoblanadi.
Katta jamoalar sharafini himoya qilayotganlar to‘purarlar orasida Mxitaryandan Chiro Immobile bir yoshga kichkina xolos. A Seriya to‘purarlari bahsida etakchilik qilayotgan “Yuventus” etakchisi Krishtianu Ronaldu va “Roma” hujumchisi Edin Jeko bu yil o‘ttiz oltiga kiradi. “Milan”ning oltita uchrashuvida 10 ta gol urgan jamoaning asosiy yulduzi Zlatan Ibrohimovich qirqni qoralab qo‘ydi.
Ayni paytda “Sampdoriya”dan “Yuventus”ga o‘tishi kutilayotgan Fabio Kvalyarella shu oyning o‘zida 38-bor tug‘ilgan kunini nishonlaydi. Bu ro‘yxatga “Inter” hujumchisi Romelu Lukaku to‘g‘ri kelmaydi xolos. Belgiyalik hujumchi bu yili 28 yoshga to‘ladi.
Ta’kidlash joizki, yuqorida tilga olingan to‘purarlar qanchalar zo‘r bo‘lmasin yaqin yillar ichida faoliyatini yakunlashi yoki kamtarroq klublarga o‘tib ketishi haqiqatga yaqinroq. Chunki, futbolda yosh baribir muhim rol o‘ynaydi. Buni Zlatan Ibrohimovichdek jismonan baquvvat va chidamli o‘yinchining jarohatlar to‘ridan chiqib keta olmayotgani ham tasdiqlab turibdi.
Albatta, superklublar yoshi o‘tib borayotgan futbolchilarning o‘rniga oldindan boshqalarini kuzatib borishi sir emas. Shu ma’noda, “Jenoa” etakchisiga aylanib borayotgan Eldor Shomurodovning ham katta jamoalar nazariga tushishiga umid qilamiz. Zotan, hamyurtimizning o‘zi Genuya klubi uning faoliyatida ko‘tarilish uchun bir bosqich ekanini ta’kidlagan. U faoliyatini oxirigacha “Jenoa”da o‘ynamoqchi emas.
Xorij nashrlari Ballardini jamoasining so‘nggi ikki o‘yinida eng yaxshi futbolchi, deb e’tirof etilgan Eldorning Italiyada tobora hurmati oshib borayotgani haqida yozmoqda. Boshida Italiyaning ayrim injiq va talabchan mutaxassislari va muxlislari o‘zbek yigitini tan olishni istamadi. Eldorning mehnatsevarligi, kamtarligi va italyan tilini tez o‘zlashtirishga ishtiyoqi balandligi mahalliy jurnalistlar o‘rtasida unga e’tiborni kuchaytirish barobarida “Jenoa” muxlislarining mehrini ham uyg‘otdi.
“Sport Ekspress” nashrining yozishicha, Italiyaning eng keksa jamoasini ligada olib qolish uchun to‘rtinchi marotaba yordamga kelgan Davide Ballaridini avvaliga o‘zbek hujumchisiga ishonch bildirmagan bo‘lsa-da, endi uning fikri o‘zgargan. Tajribali murabbiy huddi genuyalik muxlislari kabi Shomurodov o‘z o‘yini bilan “Jenoa”ga katta yordam berishiga tobora ishonchi ortib bormoqda.
Hozircha, A Seriya jadvalida oxiridan bitta yuqorida joylashgan “Jenoa”ning o‘yinida ijobiy o‘zgarishlar sezila boshladi. Davide Ballardini hujum chizig‘ida boshlang‘ich tarkibga qaysi futbolchi munosib ekanini bilib oldi. Qishki transferlar davrida genuyaliklar ko‘p o‘yinlarda pand berayotgan himoya chizig‘ini kuchaytirish eng dolzarb masala ekanini tushunib etdi. Bu borada amaliy ishlar qilinmoqda.
“Jenoa” A Seriyadagi navbatdagi uchrashuvini 9 yanvar kuni o‘z maydonida “Bolonya”ga qarshi o‘tkazadi. Bo‘lajak o‘yinda Eldor Shomurodov yana o‘zini ko‘rsata olishiga umid qilamiz.
Fikrlar