"Sho‘rtan"da vaziyat o‘zgarsa, qaysi klubdan o‘yinchilar olinishi oydinlashmoqda. Kriushenkoning pullari tayyor, faqat...

“Sho‘rtan” klubi pro-ligadagi to‘rtta o‘yinda ham yutqazdi. Yirik hisoblardagi mag‘lubiyatlar endi odatiy holdek tuyulyapti. Negaki, jamoada raqobat yo‘q, futbolchilar etishmovchligi yuz beryapti.

Hammaga ma’lum, “Sho‘rtan” qarzdorlik sababli, FIFAning ta’qiqiga uchragan va yangi o‘yinchilarni transfer qilish imkoniyatidan mahrum qilingan. Qachonki, belaruslik Igor Kriushenko va uning yordamchisidan bo‘lgan qarzdorlik bartaraf qilinsa, vaziyat o‘zgarishi mumkin.

Jamoa bosh murabbiyi Asror Aliqulovga ham oson tutib bo‘lmaydi. U sports.uz muxbiri bilan suhbatda og‘riqli muammolar haqida gapirdi va Kriushenkoga to‘lanadigan pullar ham tayyorligini aytdi.

- Igor Kriushenko masalasi deyarli hal bo‘lish arafasida turibdi, - deb so‘zini boshladi, bosh murabbiy. - Klub menejeri Shamil Yarulin va homiyimizning harakati bilan to‘lanadigan pullari tayyor. Faqat Kriushenkoga aloqaga chiqib, unga pullarni qay tartibda to‘lab berish masalasi qolgan xolos. Yarulin uning o‘zi bilan aloqaga chiqdi. Bizga qolsa, Igor Nikolaevich O‘zbekistonga kelib pullarini olib ketsa, yaxshi bo‘lardi. Ammo u kelmasligini aytgan. Bu borada PFL ham yordam beryapti. Qanday yo‘l bilan bo‘lsa ham, tez kunlarda bu masalani hal qilish harakatidamiz. Kriushenko hamda Vorivonchikdan qancha qarzdorlik borligini ochig‘i bilmayman. Igor Kriushenkoni sizning yordamingiz bilan topdik. Shundan so‘ng, uning o‘ziga Shamil Yarulin aloqaga chiqdi. Homiylarimiz qo‘llab-quvvatladi va barcha pullar tayyor. Bu katta pullar. Albatta, Kriushenko O‘zbekistonga kelganida oson bo‘lardi, to‘lashimiz. Ularga qarzlarni to‘lab bersak, o‘sha kunning o‘zidan FIFAning taqiqi olib tashlanadi. Bizda 10 dan ortiq bo‘sh joylar turibdi va zudlik bilan o‘sha pozitsiyalarni to‘ldiramiz. Yoshlarimizning saviyasi pro-liga uchun mos bo‘lmagani bois, ularning o‘rniga ham tajribaliroq o‘yinchilarni taklif qilish niyatimiz bor.

- “Sho‘rtan” chempionatdagi to‘rtta o‘yinni deyarli qarshiliksiz yutqazdi. Bunday paytda murabbiy sifatida o‘zingizni qanday his qilyapsiz?

- Nukusliklar va buxoroliklar bilan o‘yinlar mayliku-ya, ammo “Xorazm” va “Olimpik”ga qarshi uchrashuvlar juda yomon kechdi. Bunday mag‘lubiyat va jamoaning ko‘rsatgan o‘yini murabbiy uchun og‘ir jarayon.

- Sizga muammoli jamoada ishlash shunchalik kerakmi?

- Yil boshida qandaydir imkoniyat bordek edi. Boshqa jamoaga ketishim mumkin edi, ammo “Sho‘rtan”ni tanladim. Tarkibdagi bir qator futbolchilarni o‘rinbosarlar safidan o‘zim tayyorlab borganman. Meni “Sho‘rtan”ga Shamil Samigulovich chaqirgandi. Shu inson uchun ham klubda qolganman. Hozirgi holatni va mag‘lubiyatlarni hazm qilish qiyin bo‘lyapti. Ammo biz qo‘l tushirayotganimiz yo‘q. Birinchi navbatda, muxlislar oldida yuzimizni yorug‘ qilib, klub mavqeini tiklashimiz kerak.

- Mag‘lubiyatlar, birinchi navbatda, sizga og‘ir botayotgani bilinib turibdi. Bunday vaziyat tufayli murabbiylik faoliyatingizga salbiy ta’sir ko‘rsatishidan cho‘chimayapsizmi?

- Bu xavotirga solmayapti. Ha, qiyin. Faqat buni to‘g‘ri qabul qilib, o‘z ustimda ishlashim zarur. Keyinchalik yana shunday vaziyatlarga tushib qolmaslik uchun o‘zimni kuchliroq qilishim darkor.

- Tarkibda o‘yinchilar etishmasligi, raqobatning yo‘qligidan kelib chiqsak, o‘yinlardan oldin mag‘lubiyatni tan olish holatlari ham uchrayaptimi?

- Bu futbolchilarda kuzatilyapti. Masalan, bir-ikkita goldan keyin o‘yinchilar qo‘lni tushiryapti. Eng yomoni, bizda futbolchilar kamligi bois, bundan ayrim yigitlar o‘z manfaati yo‘lida foydalanyapti. Murabbiy uchun bu juda og‘ir. O‘yinchilar etarli emasligi uchun u intizomni buzishi mumkin, o‘yinda ham borini bermaydi. Siz unga e’tiroz bildirsangiz, yoqmasa ketib qolishi ham mumin. Chunki bizda boshqa o‘yinchi yo‘q. Ba’zi vaziyatlarda ularning ko‘ngliga qaraymiz. Boshqa ilojimiz yo‘q. Qolaversa, jarohatlardan ham cho‘chiyapmiz. Agar yana yo‘qotishlar bo‘lsa, “Al-Hilol”ning o‘tgan yilgi holatiga tushib qolishimiz mumkin. O‘shanda ular koronavirus tufayli o‘yinchilar etishmovchiligiga duch kelgandi. 

- “Sho‘rtan”ning hozirgi moliyaviy imkoniyati qanday?

- Bu borada muammo yo‘q. Moliyaviy tomonlama oylik maoshlar vaqtida to‘lanyapti. Faqat bizda mukofot pullari yo‘q. Xudo xohlasa, Shamil Yarulin o‘yinchilarga mukofot pullarini ajratish bo‘yicha ham ish olib boryapti. Buning uchun g‘alaba kerak. Mukofot puli o‘tgan yilning o‘rtalaridan bekor qilingandi.

- Lekin vaziyat shu ahvolda davom etsa, u holda...

- Biz hamma tomonini o‘ylaymiz. Albatta, yaxshi tarafga intilamiz, biroq yomoniga ham tayyor turishimiz kerak. Jamoamizdan taqiq olib tashlansa, qaerdan futbolchilar olishimiz mumkin? Barchasi o‘z klubiga ega. Yaqinda “Istiqlol” faoliyatini to‘xtatishi haqida aytildi. Biz ushbu jamoadan bir qator futbolchilarni taklif qilish niyatimiz bor. PFL ham o‘yinchilarni ko‘chada qolib ketishiga qarab turmasa kerak. Aslida Yarulin kelganidan keyin ancha qarzlar to‘landi. Faqat eng kattasi sifatida Kriushenkoning pullari qolgan. Hozir shu masalasini hal qilish arafasidamiz. Faqat boya aytganimdek, pullarni unga qanday etkazib berish qolgan xolos.