Шотландиялик журналист Мактоминейни, мозамбиклик вакиллар Мбаппени "Олтин тўп" учун овоз беришда биринчи ўринга қўйишди

2025 йилги "Олтин тўп" учун курашда Усмон Дембеле 1380 балл тўплади ва "Барселона"дан Ламин Ямални (1059), шунингдек, ПСЖдаги жамоадоши Витиняни (703) ортда қолдириб, совринни қўлга киритди.

Овоз беришда қатнашган 100 журналистдан 73 нафари французни биринчи ўринга қўйди. Ушбу овоз беришда иштирок этган журналистлардан кўпчилиги ўзларининг танловлари билан кўпчиликни ҳайрон қолдиришди.

Шотландиялик журналист ўз рўйхатида "Наполи" ва Шотландия терма жамоасидан Скотт Мактоминейни биринчи ўринга, грузиялик журналист ПСЖдан грузиялик Хвича Кваратсхелияни биринчи ўринга қўйди.

Мозамбиклик респондент "Реал" вакили Килиан Мбаппени биринчи, Муҳаммад Салоҳни иккинчи, Ламин Ямални учинчи, Винисиусни тўртинчи ўринга қўйди.

Шунингдек, марокашлик журналист ПСЖдаги ватандоши Ашраф Ҳакимийни, мисрлик мухбир "Ливерпуль" юлдузи Муҳаммад Салоҳни биринчи ўринга қўйди. Салоҳни, бундан ташқари, Баҳрайн, Иордания ва Жанубий Африка вакиллари биринчи ўринга қўйишди. Ҳакими биринчи қаторни Белгия ва Габон вакилларидан ҳам олди. 

Испаниядан бўлган вакиллар "Барселона" ярим ҳимоячиси Педрини 9-ўринга, "Челси" футболчиси Палмерни 6-ўринга қўйишди.