Шу ўйинчи керакми? 150 миллион евро тўланг

«Астон Вилла» раҳбарияти қатор клублар томонидан жиддий қизиқиш билдирилаётган ярим ҳимоячи Морган Рожерс трансферини 150 миллион еврога баҳолаяпти.

Маҳоратли ўйинчи учун асосий фаворит сифатида Англия Премьер-лигасининг амалдаги чемпиони тилга олинмоқда. «Арсенал» 23 ёшли англиялик футболчини трансфер қилиш устида ишлашда давом этмоқда ва унинг вакиллари билан музокараларда муайян тараққиётга эришган.

Бу ҳақда журналист Фабрицио Романо хабар берди.

Манба маълумотига кўра, Бирмингем клуби лондонликларнинг қизиқишидан яхши хабардор ва футболчи учун ўз нархини белгилаб олган. «Арсенал» трансфер суммасини камайтириш ёки тўловларнинг бошқа шакли бўйича келишувга эришиш мақсадида музокараларни давом эттирмоқчи. Ҳозирча расмий таклиф юборилмаган, аммо томонлар ўртасида алоқа сақланиб турибди.

Рожерс ўтган мавсумда барча мусобақаларда 55 та учрашувда қатнашиб, 14 та гол урди ва 11 та голли узатма берди. Унинг «Астон Вилла» билан шартномаси 2031 йил ёзигача амал қилади. Айни пайтда Рожерс Англия терма жамоаси билан жаҳон чемпионатида иштирок этмоқда ва 1/8 финалга йўлланма олди.