Шу суммани тўрт карра кўпайтиринг! Мундиалда Ўзбекистонга қарши ўйнаган футболчига катта нарх сўрашди

Испаниянинг “Альмерия” клуби Россия Премьур-лигасида иштирок этаётган “Краснодар” жамоасининг конголик ҳужумкор футболчи Брайан Сипенга бўйича юборган таклифини қабул қилмади.

Бу ҳақда журналист Кристиан Вакеро X ижтимоий тармоғида маълум қилди.

Манба маълумотига кўра, Россия клуби 20 ёшли футболчи учун 12 миллион евро таклиф қилган, аммо испанияликларни бу сумма умуман қониқтирмаган.

Қайд этилишича, Сипенгага яна бир нечта клуб қизиқиш билдирмоқда ва “Альмерия” футболчи учун шартномада белгиланган 40 миллион евро товон пулини олишни истамоқда.

Сипенга яқиндагина эркин агент сифатида “Альмерия”га қўшилган эди.

Кристиан Вакеронинг маълум қилишича, футболчи ҳатто клуб сафида бирорта расмий ўйин ўтказмасдан туриб ҳам жамоани тарк этиши мумкин. Чунки истеъдодли ёш ўйинчи 2026 йилги жаҳон чемпионатида салоҳиятини кўрсата олди.

Конго Демократик Республикаси миллий терма жамоаси сафида Сипенга иккита учрашув ўтказиб, Ўзбекистонга қарши 72 дақиқа ўйнади ва плей-оффда Англия дарвозасини ишғол қилди.