Шукурали Пўлатов: "Қизилқум" иккинчи даврага тайёр

Бугун Олий лигада иккинчи давранинг илк тури ўйинлари давом эттирилади. Навоийда "Қизилқум" жамоаси "Пахтакор"ни қабул қилади. Ушбу ўйин олдидан "Қизилқум" матбуот хизмати жамоа ҳимоячиси Шукурали Пўлатовнинг фикрлари билан қизиқди.

"Иккинчи давра беллашувларига яхши тайёргарлик кўрдик, деб ўйлайман. Тошкентдаги йиғинда асосий эътибор ўртоқлик ўйинларига қаратилди. Жамоанинг ўйин амалиёти кучайтирилди.  Жамоамиз иккинчи  даврага тайёр.  Бугун ўз майдонимизда жиддий рақиб – “Пахтакор”ни қабул қиламиз.  Мухлисларимиз учрашувга келиб, стадионни тўлдириб, бизни қўллаб-қувватлаб туришса, уларни хурсанд қилиш учун барча имкониятларимизни ишга соламиз. 

Биринчи даврада кўп ўйинларда, айниқса ўз майдонимизда кераксиз жойда очко йўқотдик. Насиб этса, мавсумнинг иккинчи ярмида чиройли ўйин намойиш этиб, керакли очколарни жамғарамиз", - деб айтиб ўтди Пўлатов