Шукуров "Кайсериспор"да захирага "михланди"ми?

Қишки трансферлар ойнасида "Фотиҳ Карагюмрук" билан хайрлашиб, "Кайсериспор"га кўчиб ўтган Отабек Шукуров Туркия чемпионатининг 29-туридан ўрин олган "Ҳатайспор"га қарши баҳсда захирада қолдирилиб, 76-дақиқада майдонга туширилди. Ярим ҳимоячи ушбу ўйинда 7 мартагина тўпга тегинди. Шу билан бирга, 3 та аниқ пас берган.

Шукуров кетма-кет тўртинчи марта учрашувни захирадан бошламоқда. Бундан олдин футболчи "Истанбул Бешекшеҳир", "Анкарагучу" жамоалари билан бўлиб ўтган баҳсларда бошланғич таркибдан жой ололмади. Бу статистикани кўрган одамда Отабекнинг асосий таркиб учун курашда мағлуб бўлди, деган тахмин пайдо бўлиши мумкин. Аммо ҳолат бошқачароқ. 

Маълум бўлишича, Шукуров 2-3 ҳафта олдин кичик жароҳат олган. Шу сабабли, мураббийлар штаби уни камроқ майдонга туширяпти, яъни терма жамоамизнинг муҳим футболчиларидан бирини сафдан чиқишининг олди олинмоқда.

Шуни ҳам таъкидлаш керак, "Кайсериспор" таркибида Отабекнинг позициясида ҳаракат қилаётган яхши номлар мавжуд. Шулардан бир Картал Йилмаз. Туркиялик ярим ҳимоячи "Бешиктош"дан ижарага олинган бўлиб, ўйин амалиёти кўпроқ берилиши учун кайсериликлар сафига ўтганди. Жамоани Бурак Йилмаз қабул қилиб олганидан бери Картал биронта учрашувда захирада қолгани йўқ. 

Шукуровнинг кейинги асосий рақобатчиси Меҳди Бурабиядир. 32 ёшли марокашлик қишки трансферлар ойнасида клуб таркибига қўшилди ва барча ўйинни асосий таркибда бошлади. Шунингдек, сўнгги тур "Ҳатайспор"га қарши баҳсда муҳим голни ҳам урди. 

Бу икки футболчидан ташқари ҳамюртимиз Эрон аъзоси Али Карими билан ҳам бошланғич таркиб учун кураш олиб бориши керак. "Кайсериспор" эса турнир жадвалида 13-ўринда бормоқда. Жамоа Еврокубокларга йўлланма олишдан кўра кўпроқ лигада қолиш учун курашаётгандек. Олдинда эса кайсериликларни "Аланьяспор"га қарши баҳс кутмоқда. Балки мазкур тўқнашувда Шукуровга имкон берилар.