Сифатли ўйинда голсиз дуранг ёхуд "Андижон"нинг "Заря"га қарши ўйини ҳақида

Андижон жамоаси Анталиядаги йиғини доирасида Украинанинг номдор ва тажрибали “Заря” клубига қарши ўртоқлик учрашувида 0:0 ҳисобида дуранг қайд этди.

Ҳисоб таблосида голлар бўлмаганига қарамай, майдонда андижонликлар томонидан жуда яхши ва ишончли ўйин намойиш этилди. Учрашув давомида Самвел Бабаян бошчилигидаги футболчилар тўпни назорат қилиш, ҳужумларни оқилона қуриш ва хавфли вазиятлар яратишда фаол бўлишди. Айниқса, иккала бўлимда ҳам бир неча бор рақиб дарвозаси олдида реал голли имкониятлар юзага келди.

"Андижон" ҳимояда ҳам интизомли ҳаракат қилди, рақибнинг босимларига қарши бардошли ўйин кўрсатди ва дарвозаси дахлсизлигини сақлаб қолди. Бу беллашув "Андижон"нинг жисмоний тайёргарлиги, жамоавий ўйини ва тактик жиҳатдан ўсиб бораётганини яққол кўрсатди. Энг муҳими, жамоа майдонда ўз услубини топиб бораётгани ва ҳар бир ўйинда янада ишончли кўринишга эга бўлаётгани сезилди.

Ушбу учрашув натижаси — фақат ҳисоб эмас, балки жамоанинг келажакдаги расмий ўйинлар олдидан тайёрлиги ва руҳий ҳолатининг яхши эканини кўрсатувчи муҳим кўрсаткичдир. "Андижон" мухлисларига умид ва ишонч улашган ушбу ўйин келгуси беллашувларда янада яхши натижалар учун мустаҳкам пойдевор бўлди.

“Андижон” - “Заря” (Украина) - 0:0).

5 февраль. Анталия. “Сусеси спорт маркази” стадиони.

Бош ҳакам: Робертас Шмитас.

Ёрдамчи ҳакамлар: Витантис Казлаускас, Айварас Лукошус.

Захира ҳаками: Эгидиус Амшеус (барчаси - Литвадан)

“Андижон”: Раҳимжон Давронов, Иброҳим Йўлдошев, Одил Абдумажидов, Неманья Чаласан, Маҳмуд Махамаджонов, Александр Андроникашвили, Жамшид Болтабоев, Хумоюнмирзо Иминов, Усмонали Исмоналиев, Дониёр Абдуманнопов, Пўлатхўжа Холдорхонов.

Захирадан майдонга тушганлар: Дамир Темиров, Муҳаммадкарим Тоиров, Сардор Азимов, Кристиан Новак, Аббос Абдуғаффоров.

“Зарья”: Олександр Сапутин, Жордан, Габриел Ескиня, Роман Вантух, Деян Попара, Артём Слесар, Пилип Будкивский, Маляш Навин, Верлей Рейнальдино, Богдан Кушниренко, Неманья Андюсич.