“Siti” futbolchisi xet-trik qilgani uchun Xolandni so‘kdi (foto)

Futbolda yaxshi an’ana bor. Ayrim ligalarda raqib darvozasiga uchta gol urgan futbolchi o‘sha to‘pga jamoadoshlarining tilak va imzolarini yig‘ib, esdalikka olib qo‘yadi.

“Manchester Siti” hujumchisi Erling Xoland ketma-ket ikkita uchrashuvda xet-trik qayd etdi. Har ikki holatda ham norvegiyalik futbolchi to‘pni jamoadoshlariga imzolatib oldi.

Shunisi qiziqki, jamoa ichida kimlardir 24 yoshli o‘yinchining ko‘p gol urayotganidan zerikkan ko‘rinadi. Avvalgi turdan keyin o‘yinchilardan biri “to‘p imzolash jonga tegdi”, degan xitob yozib qoldirgan edi.

Bu gal esa, qaysidir futbolchi Xolandni qo‘pol so‘zlar bilan “siylab”, yozuv qoldirdi. Xoland bu to‘pni ijtimoiy tarmoqdagi sahifasida e’lon qildi.

Eslatib o‘tamiz, 2022 yilning yozida manchesterliklar safiga qo‘shilgan Xoland “shaharliklar” safida hozirgacha 102 ta uchrashuv o‘tkazib, 97 ta gol va 14 ta assist qayd etgan.