“Сити”нинг таклифи қабул қилинди. Гвардиола суперфутболчига эга бўлади!

“Манчестер Сити” раҳбарияти “Астон Вилла” етакчиси Жек Грилиш учун 100 миллион фунт таклиф қилган эди.

Маълумотларга қараганда, “Астон Вилла” бу таклифни қабул қилди ва маҳоратли ярим ҳимоячини Манчестерга юборишга рози бўлди. Айни пайтда томонлар трансфер бўйича иш бошлаш арафасида турибди.

Агар ушбу трансфер амалга ошса, у Англия премьер-лигасининг янги трансфер рекорди сифатида қайд этилади.

2012 йилдан бери “Астон Вилла”да ўйнаётган Жек Грилиш ўтган мавсумда премьер-лигада 26 та ўйин ўтказиб, олтита гол урди ва 12 та голли пас узатди.

Грилишга “Манчестер Юнайтед” ҳам анчадан бери қизиқиш билдираётган эди. Бироқ, Уле-Гуннар Сульшер ҳужумкор ярим ҳимоячи позициясига “Боруссия” етакчиси Жейдан Санчони маъқул кўрди.