"So‘g‘diyona"ning bugungi g‘alabasi 2024/25 yilgi mavsum uchun OChLda O‘zbekistonning kvotalari oshishiga sabab bo‘ldi

“So‘g‘diyona” OFK Kubogi Markaziy mintaqa finalida maydonga tushib, Tojikistonning “Xo‘jand” jamoasini yirik 4:0 hisobida g‘alaba qozondi. Bahsda Jasur Hasanov ikki bor o‘z nomini tabloga yozdirib qo‘ygan bo‘lsa, Shoxruz Norxonov va Javohir Qahramonov bittadan gol urdi.

Bugungi g‘alabadan keyin G‘arbiy zonada OFK klublari reytingi endi shunday ko‘rinish oldi.

Asosiy yangilik shundan iboratki, O‘zbekiston 2024/2025 yilgi mavsumda OChL uchun 3+1 kvotasini naqd qildi. Ya’ni 3 ta klubimiz to‘g‘ridan-to‘g‘ri musobaqa guruh bosqichiga yo‘l olsa, yana bir jamoamiz saralashda ishtirok etadi. 

“So‘g‘diyona” va “Nasaf” bu mavsumda boshqa ochko ololmagan taqdirda ham, Eronning “Fulad” klubi barcha uchrashuvlarda g‘alaba qozonib, Chempionlar ligasi g‘olibiga aylangan taqdirda ham, O‘zbekiston hisobidagi ochkolar soni 45,057ni, Eronda esa 44,975ni tashkil qiladi.