Сўраманг! Бу футболчи сотилмайди

Леверкузеннинг “Байер” клуби ҳимоячи Жаррел Куансани жорий ёзда сотиш имкониятини истисно қилмоқда.

Бир кун аввал 23 ёшли Куансани сотиб олиш бўйича музокараларга ҳимоя чизиғи Вильям Салиба ва Юрриен Тимбернинг жароҳатлари сабаб кучайтиришга муҳтож бўлган “Арсенал” ҳам қўшилгани ҳақида маълумот тарқалган эди.

Бундан аввал жорий ёзда Куанса “Ливерпуль”га қайтиши мумкинлиги ҳам хабар қилинган эди. “Байер” Жаррелни бир йил олдин айнан “Ливерпуль”дан бонусларни ҳам қўшганда 35 миллион фунт стерлингга сотиб олган.

Бироқ Sky Sport Germany хабарига кўра, “Байер” ички қарор қабул қилган ва Куансани бу ёзда сотмайдиган бўлди.

Бундан ташқари, “Ливерпуль” Англия терма жамоаси футболчисини қайта сотиб олиш опциясининг муддатини ўтказиб юборган. Шу сабабли, Леверкузен клуби Жаррелнинг келажагини тўлиқ назорат қилмоқда.