Спаллетти «Ювентус» учун асосий ҳужумчи номзодларини аниқлади

«Ювентус» бош мураббийи Лучано Спаллетти жамоа ҳужум чизиғини кучайтириш учун икки асосий номзодни белгилаб олди.

Унинг трансфер рўйхатида мадридлик «Атлетико» форварди Александр Сёрлот ва «Кристал Пэлас» ҳужумчиси Жан‑Филипп Матета бор. Инсайдер Николо Скира ижтимоий тармоқларда ёзганидек, италиялик мутахассис жамоа ҳужумига етакчилик қиладиган, жисмонан бақувват ва гол уриш қобилияти юқори бўлган марказий ҳужумчини олиб келишни қатъий талаб қилмоқда.

«Ювентус» спорт директори Рики Массара эса «Манчестер Юнайтед» ҳужумчиси Джошуа Зиркзее номзодига ҳам қизиқиш билдирмоқда. Бироқ Спаллетти фикрига кўра, голландиялик футболчида унинг тактик тизими учун зарур бўлган айрим муҳим хусусиятлар ва малакалар етишмайди.

Transfermarkt портали маълумотларига кўра, 30 ёшли Александр Сёрлотнинг бозор қиймати 25 миллион еврони ташкил этади. 29 ёшли Жан‑Филипп Матета 30 миллион еврога баҳоланган, 25 ёшли Джошуа Зиркзее учун эса тахминан 40 миллион евро сўралаётгани қайд этилган.