Sport TV журналисти: "Ўзбекистон мундиалда сенсация кўрсатадиган жамоалардан бўлади"

Хабарангиз бор, бугун 2026 йилда бўлиб ўтадиган Жаҳон чемпионати учун қуръа ташланади.

Sports.uz сайти мазкур мусобақада Ўзбекистон терма жамоасининг иштирок этиши мавзусида Sport TV журналисти Абдурашид Одилов билан қисқа интервью уюштирди.

Ўзбекистоннинг гуруҳ босқичидаги рақиблари кимлар бўлади?

"Гуруҳ босқичи борасида тахминларим: Нидерландия, Колумбия, Ўзбекистон, Гаити. Интуициямга кўра, мана шу жамоалар бир квартетни ташкил этиш эҳтимоли кўпроқдек туйиляпти. Ўзимга қолса, мана бундай гуруҳ шаклланишини истар эдим: Португалия, Уругвай, Ўзбекистон, Италия (агар ЖЧга чиқа олса, албатта)."

Мундиалда қайси босқичгача етиб бора оламиз?

"Насиб этса, Ўзбекистон Мундиалнинг сенсатион жамоаларидан бўлади. Хоҳ орзу, хоҳ тахмин деб қабул қилинг. Менимча, чорак финалгача бора оламиз!"

Сизнингча, Жаҳон чемпионатида таркибимиздаги футболчилардан кимлар порлаб, кучли чемпионатларга йўл олиши мумкин?

"Жаҳон Чемпионати стартигача кам вақт қолди, аммо бу давр терма жамоамиз таркибига янги номзодлар жалб этилиши учун етарли деб ҳисоблайман. Бошқа мамлакатларда бўлгани каби ўзбекистонлик футболчилар ҳам бундан кейин Мундиал орзусида яшайди ва максимал ўзини кўрсатишга ҳаракат қилади. Терма жамоа ва ЖЧга интилади. Суперлигамиз март ойида бошланади ва июнгача биз терма жамоа учун янги номзодларни кашф этсак керак.

Ҳозирги таркибдан эса Ҳусниддин Алиқулов, Остон Урунов, Аббосбек Файзуллаев топ-5 йўлга олиши мумкин. Шунингдек, Элдор Шомуродов ва Абдуқодир Ҳусанов Мундиални ёндириб берадиган йигитлардан бўлса керак! Насиб!"