SPORTS.uz талқини бўйича Суперлига 19-тур рамзий терма жамоаси

Дарвозабон: Жавоҳир Илёсов (“Локомотив”)

Тошкент дербиси ўз мақомига мос равишда кескин ва баҳсли вазиятларга бой бўлди. Гол ўтказиб юборганига қарамай, Илёсовни рамзий жамоамиз постига жойлаштирганимизнинг бир қатор сабаблари бор. 

Аввало, у жамоаси билан турнинг марказий беллашувларидан бирини ютди. Бу орқали тошкентликлар турнир жадвалидаги мавқейини ҳам анча яхшилаб олди. Энг муҳими, унинг кўплаб сэйвлари ва ишончли ҳаракатлари бўлмаганида, “темирйўлчилар” ўз уйида мағлубиятга учраши ҳам мумкин эди. 

Гол ўтказиб юборилган вазиятда ҳам, жарима майдони ичига узатиб берилган тўпни уриб юборган Жавоҳир иккинчи зарба олдида ожиз қолди. 

Чап қанот ҳимоячиси: Станислав Андреев (“Металлург”)

Икки бир-бирига ўхшаш жамоалар тўқнашувида муроса кўчаси танланди. Ҳар икки клуб ҳам Суперлиганинг ҳар қандай жамоасига қарши тенгма-тенг ўйнай олиши ва исталган рақибга муаммо туғдира олиши мумкин. 

Бекободликлар етакчиси Намангандан 1 очко олиб қайтиш йўлидаги энг катта меҳнатни амалга оширди, дея оламиз. Ҳисобни тенглаштирувчи голдан ташқари, Турғунбоев ҳаракат қилаётган қанотни бир қадар зарарсизлантириш билан жамоасининг натижасига салмоқли ҳиссасини қўша олди. 

Марказий ҳимоячи: Бобур Аманов (“Бухоро”)

Бухороликлар бутун ўйин давомида “Насаф” ҳужумларидан ҳимояланиш пайида бўлишди. Ўйин аввалидаги бир нечта бурчак зарбалари ва якундаги фаолликни инобатга олмасак, номинал мезбонлар аксарият вақтни ўз яриммайдонида ўтказди. Дарҳақиқат, ҳакам томонидан қўшиб берилган сўнгги дақиқалар ўтиб бораётган бир пайтда, уларда ғалабани илиб кетиш имконияти ҳам юзага келди. Бироқ вазиятни гол билан якунлаш насиб этмади.

Сентябрь ойининг энг яхши мураббийи ва футболчиси жой олган жамоага қарши ўйнашнинг ўзи бўлмайди! Абдихолиқовнинг шу куни гол ура олмаслигида Аманов бошлиқ “Бухоро” ҳимоясининг ўрни беқиёс.

Марказий ҳимоячи: Иван Йосович (“Қўқон-1912”)

Қўқонликлар Норбековнинг кутилмаган четлатилишидан сўнг, бутун бошли таймни бир киши кам бўлиб ўтказишди. Аммо ҳимояга шу қадар ишонч кучли эдики, иккинчи бўлимнинг қарийб 20 дақиқаси давомида қўқонликлар ҳужумларга ҳам ўтиб турди. Кейин эса, Ашурматов шогирдлари чизиқли ҳимоя ташкил этиб, майдон эгалари томонидан узатилган ҳеч бир тўпни жарима майдони ичига йўлатмади. Водийликларга ғалаба келтирган ҳимояга таҳсинларимиз ифодаси сифатида Йосовични рамзий терма жамоамиз ҳимоясига лойиқ кўрдик. 

Ўнг қанот ҳимоячиси: Ҳожиакбар Алижонов (“Пахтакор”)

Тошкентликларнинг навбатдаги ўйини уларга галдаги ғалабани келтирди. Арвеладзе ўзига шу пайтгача тақдим этилган муддат давомида яхши жамоа шакллантира олганини нафақат миллий биринчилигимизда, балки ОЧЛда ҳам кўрсатиб қўйди. 

Алижонов “Қизилқум”га қарши ўйинда биргина вазиятда Саноевга тўпни олдириб қўйиб, дарвозасини кичик хавфга қўйди. Қолган вазиятларда Ҳожиакбарнинг мудофаа ва ҳужумдаги ўйини анча яхши чиқди. 

Кетма-кет икки марта ноқулай позициядан йўллашга муваффақ бўлган зарбаларини Нестеров неча йиллик тажрибаси эвазига қайтарди. 

Марказий ярим ҳимоячи: Евгений Чумак (“Металлург”)

Бекободликларнинг энг ишонган футболчиларидан бири ҳисобланган Чумак ушбу турда “Навбаҳор” посбони Ўткир Юсуповни кучли зарбалари билан бир неча маротаба сийлаб кўрди. Улардан бирини ўз вақтида ушлаб қолишга эришмаган “лочинлар” посбони Андреевнинг такрорий зарбасига ҳам дучор бўлди. 

Марказий ярим ҳимоячи: Муҳаммад Йўлдошев (“Андижон”) 

Бахтиёр Ҳамидуллаев бошчилигидаги “Андижон”да, ваниҳоят, потенциал учқунлари кўрина бошлаяпти. Собиқ ҳужумчи легионерларга жавоб бериб юборган ҳолда, жамоанинг ўзидан керакли футболчиларни ториб олмоқда. Суперлига ихлосмандлари орасида аллақачон андижонликларни Про-лигага тушириб юборганлар ҳам йўқ эмасди. Энди эса бу ҳақида ҳам ўйлаб кўрмаса бўлмайдиган ҳолатга келиб қолдик.

Ёш футболчининг кучли ва аниқ зарбаси орқали "бургутлар" мавсумдаги камёб голларидан бирини рақиб дарвозасига киритишга эришди.  

Чап қанот вингери: Жалолиддин Машарипов (“Пахтакор”)

“Шерлар”ни майдонга сардор сифатида бошлаб тушган Машариповни рамзий терма жамоага киритмай илож йўқ. Аммо унинг “Пахтакор” учун қилаётган меҳнатларини яна янги сўзлар билан таъриф этишга ҳам ожизман. Дердийокнинг голи айнан унинг узатмасидан сўнг юзага келди. Бундан ташқари, чап қанотда тиниб-тинчимаган терма жамоамиз аъзоси рақиб ҳимоячиларига бир зум бўлсин хотиржам ўйнаш бахтини бермади. 

Ўнг қанот вингери: Азиз Турғунбоев (“Навбаҳор”)

Ҳа, юқорида Станислав Андреев Турғунбоевни ўз қанотида эркин ҳаракат қилишига яхшигина тўсқинлик қилганини ёздик. Аммо ким айтади Азизни фақат ўнг қанот вингери вазифасини бажаради деб?! Унга жамоани ҳозирча мураббий сифатида учрашувга олиб тушаётган Нўъмон Ҳасановдан аввалроқ, Андрей Канчельскис ҳам майдон бўйлаб эркин ҳаракат қилиш ҳуқуқини берарди. Терма жамоа сафида ҳам бир нечта хавфли зарбалари билан кўпчиликнинг ёдида қолганди. Ушбу тур ҳам унинг ижросида бир қанча хавфли урунишлар кўришга муваффақ бўлдик. 

Марказий ҳужумчи: Филипп Райевац (“Қўқон-1912”)

Райевацнинг ўйинини кўрган инсон уни марказий ҳужумчига ўхшатмайди. Аммо қўқонликлар матбуот хизмати тақдим этган тактик схемада у айнан страйкер вазифасида қайд этилган. Майдонни кузатганимизда эса легионер футболчининг вазифаси ҳужумкор ярим ҳимоячидан ҳам орқароқ зонада ҳаракат қилувчи футболчини эслатди. Бу қизил карточка билан ҳосил бўлган вазият тақозоси эканлиги аниқ. Аммо аввалги турларда ҳам бунинг гувоҳига айлангандик. Ашурматов ўз жамоасига тотал футбол фалсафасини сингдираётгани кўриниб турибди. Ғалаба голи муаллифи рамзий терма жамоамиз ҳужумидан муносиб ўрин олди, назаримда.

Марказий ҳужумчи: Темурхўжа Абдухолиқов (“Локомотив”)

“Темирйўлчилар”нинг муваффақиятли ўйинлари сериясини кузатар эканмиз, ҳақли савол туғилмоқда: “Локо”нинг ўйини очилиб кетдими, Темурхўжаникими? Албатта, жамоада мен деган тушунча бўлмайди. Ғалабаларда барча ўз ҳиссасини қўшмоқда. Бироқ Абдухолиқов ростдан ҳам ўз даражасига қайтиб бораётгандек кўринмоқда. Терма жамоага номзод ҳужумчининг ривожланаётганидан хурсанд бўламиз, холос. 

“Бунёдкор” дарвозабонини эса ҳақиқий ҳужумчиларга хос равишда, моҳирона совуққонлик билан алдаб ўтганига эса гап бўлиши мумкин эмас!

Абдулвосид Валихонов тайёрлади