SPORTS.uz'да жаҳон чемпионати кундалиги (7-сон)

Қатарда жаҳон чемпионати давом этмоқда. SPORTS.uz сайти ижодкорлари ушбу мундиал кундалигини тақдим этади.

Япония иккинчи турда Коста-Рикага ютқазиб қўйди. Буни кўпчилик тасодифга йўймоқда. Чунки жамоаларнинг аввалги тўқнашувларида “кунчиқар юрт” вакиллари рақибига енгилмаганди.

Бельгиянинг “олтин авлод”и жаҳон чемпионатида фақатгина 2 марта ғалаба қозонган Марокашга имкониятни бой берди. Энди улар Марокашдан таслим бўлган Португалия ва Шотландия каби жамоалар қаторидан ўрин олди.

Канада тезкор гол урди-ю, кейинги дақиқаларда ўз дарвозасидан 4 та тўп олиб чиқди. Хорватия ирода намойиш этишни бошлади. Уларнинг нияти яна камида финал бўлса ажаб эмас.

Германия ўзи учун финалга тенг ўйин ўтказди. Германияликлар илк турда 3 очкони қўлдан бой бергани боис бу ўйиннинг қадри ошиб кетди. Захирадан майдонга тушган футболчи гол уриб Германия учун имкон тақдим этди.

Япония - Коста-Рика 0:1

Куннинг илк баҳси қитъадошларимиз иштирокида бўлиб ўтди. Унда Япония Шимолий Американинг Коста-Рика термасига қарши майдонга тушди. Осиёликларнинг устунлиги остида кечган баҳсда номинал меҳмонлар 1:0 ҳисобида зафар қучди.

Ягона гол 81-дақиқада Кейшер Фуллер томонидан киритилди. У рақиб ҳимоячиларининг хатосидан унумли фойдаланиб, тўпни дарвозабоннинг устидан ташлаб қўйди. Ҳисоб ўйин охирига қадар ўзгармай қолди ва Навас шериклари қийинчилик билан 3 очкони қўлга киритди.

Коста-Рика мазкур мундиалда рақиб дарвозаси томон умумий ҳисобда 4 та зарба йўллади. Уларнинг биттаси аниқ борган ва голга айланган.

Жоэль Кэмпбелл беллашувда 15 бор дуэлларда устун чиқди. Жорий жаҳон чемпионатида ҳозирча бундан яхши кўрсаткич қайд этилмаган.

Шимолий Америка вакиллари Японияни барча мусобақалар доирасида илк бора мағлуб этди. Олдин бўлиб ўтган учрашувларда 1 дуранг ва 3 мағлубият қайд этилган. Шунингдек, терма мундиалда Осиё жамоаларини иккинчи бор таслим этди. 2002 йилги дунё биринчилигида Хитой 2:0 ҳисобида Коста-Рикага имкониятни бой берганди.

КОНКАКАФ аъзоси бўлган мамлакат жамоаси очколари сонини 3 тага етказган ҳолда, айни пайт турнир жадвалида 3-поғонада кетмоқда. "Самурайлар" ҳам шунча очко жамғарган. Аммо уларда тўплар фарқи яхши экани боис 2-ўринни банд этиб турибди.

Бельгия - Марокаш 0:2

Навбатдаги тўқнашувда Бельгия ва Марокаш жамоалари ўзаро куч синашди. Мухлисларни асло зериктирмаган ушбу баҳсда кутилмаганда Марокаш термаси 2:0 ҳисобидаги ғалабани қўлга киритди.

45+2-дақиқада ўйиндаги илк гол киритилди. Жарима зарбасидан Марокаш футболчилари унумли фойдаланди. Бироқ сўнгги паллада номинал меҳмонлар аъзоси ўйиндан ташқари ҳолатда экани ҳакам томонидан қайд этилди.

Шунга қарамай, африкаликлар барибир ҳисобда олдинга чиқиб олди. 73-дақиқада Сабири яна бир жарима зарбасини голга айлантирди. Бу сафар ҳеч қандай офсайд ҳолати йўқ, дея эътироф этилди.

Бу голдан кейин "сариқ қитъа" вакиллари мувозанатни тиклашга қаттиқ ҳаракат қилди. Лекин бу самарасиз бўлиб чиқди. Устига-устак, 90+2-дақиқада Закария Зийешнинг узатмасидан сўнг тўпни Куртуа қўриқлаётган дарвозага жойлаб қўйди.

Бельгия ўйиннинг дастлабки 25 дақиқасида 69 фоиз тўп назоратига эгалик қилди.

Шунингдек, Марокаш мундиаллар тарихида ўзининг учинчи ғалабасини қўлга киритди. Бундан олдин мағлуб этилган термалар 1986 йилда Португалия ва 1998 йилда Шотландия эди.

Абдулҳамид Сабири ЖЧ-2022да жарима зарбасидан гол урган дастлабки футболчи бўлди. У захирадан майдонга тушганига атиги 6 дақиқа бўлганида, мамлакати учун ўта муҳим голни урди.

Марокашликлар ушбу беллашувдан сўнг очколари сонини 4 тага етказиб олди. Терма ҳозирча жадвалда 2-поғонада кетмоқда. Аламли мағлубиятга учраган Бельгия 3 очко билан 3-ўринни банд этган.

Хорватия - Канада 4:1

1-турдан ўрин олган Хорватия - Канада баҳсида европаликлар 4:1 ҳисобида зафар қучди.

2-дақиқада Альфонсо Дэвис беллашувда ҳисобни очди. Ўнг қанотдан оширилган тўпни Дэвис боши билан тўрга йўллади. 

Кейинчалик, Крамаричнинг дубли, шунингдек, Ливайя ҳамда Майернинг голлари эвазига Хорватия ҳисобни 4:1 кўринишига келтириб қўйди. 

Шу тариқа, Златко Далич шогирдлари ҳисобидаги очколар сони 4 тага етди. Канада эса 2 турдан сўнг бирорта ҳам очко тўплай олмай, мусобақани тарк этиши аниқ бўлиб улгурди.

2-дақиқада рақиб дарвозасини ишғол этган "Бавария" ҳимоячиси бу орқали Канада терма жамоасининг жаҳон чемпионатлари тарихидаги илк голи муаллифига айланди. 

Шимолий америкаликлар ўз тарихида иккинчи бор мундиалда иштирок этмоқда. Улар илк бор 1986 йилда Мексика мезбонлик қилган жаҳон чемпионатида қатнашган, аммо гол уролмаган.

Жон Хердман шогирдлари Қатар-2022нинг илк турида Бельгия дарвозасини ҳам ишғол этолмаганди. Ўшанда айнан Дэвиснинг 11 метрлик нуқтадан берган зарбасини Куртуа қайтарганди.

Испания - Германия 1:1

Кеча оқшом турнинг марказий қарама-қаршиликларидан бири бўлиб ўтди. Унда Испания - Германия баҳси кузатилди. Қизиқарли кечган беллашув 1:1 ҳисобидаги дуранг билан якунланди.

Захирадан майдонга тушган Мората 62-дақиқада Альбанинг узатмасидан кейин ҳисобни очди. 83-дақиқа ўтиб бораётган бир пайтда Никлас Фюллькруг мувозанатни тиклади. Германия сафида ҳам захирадан майдонга тушган ҳужумчи гол урди.

Шу тариқа, "қизил фурия" очколари сонини 4 тага етказиб олди. Германия ҳисобида 2 тур якунига кўра, 1 очко мавжуд.

Испания терма жамоаси жорий турнирда урган голлари сонини 8 тага етказиб, ўз рекордини янгилашга эришди. “Қизил фурия” бу натижани янгилаши учун 2 ўйин кифоя қилди. Бунгача Испания терма жамоасининг рекорди 2010 йил қайд этилган ва ўшанда чемпионлик қўлга киритилган. Испанлар мусобақа давомида 7 та тўп киритганди.

Ханс-Дитер Флик шогирдлари учрашув давомида тўпга 35,8 фоиз ҳисобида эгалик қилишди. Бу терма жамоанинг ЖЧ-2022даги энг ёмон кўрсаткичидир.

Испанлар билан ўйинга қадар Германиянинг бу борадаги антирекорди 1986 йил Мексикадаги мундиалда Марокашга қарши ўйинда қайд этилганди. Ўшанда немислар тўпга 39 фоиз эгалик қилганди.

Учрашувда тўлиқ ҳаракат қилган Мануэль Нойер мусобақадаги 18-ўйинини ўтказди. 36 ёшли дарвозабон бу борада мундиалда энг кўп баҳсда иштирок этган посбонга етиб олди. Рекорд ҳамюрти Зепп Майер ҳамда бразилиялик Клаудио Таффарелга тегишли эди.

Германия охирги 10 та баҳсда 6-маротаба рақиблари билан дуранг ўйнади, 2 марта мағлубиятга учради ва икки учрашувда муваффақиятга эришди.