Сречко Катанец биздан ёрқин футболни тортиб олди, аммо...

Дарҳақиқат, словениялик мутахассис жамоа постига келгач, термамиз намойиш этаётган ўйинларда ёрқинлик йўқолиб қолди, аммо мураббий унинг ўрнини доим бизга етишмаган ишонч ва совуққонлик билан тўлдирмоқда.

Тўғри, аввалгидек бир ўйинда 6-10 маротаба рақиб дарвозасига зарба йўлламаяпмиз, аммо дарвозамиздан олиб чиқаётган тўпларимиз сони камайди. Балки, аввалгидек тўп назорати бизда эмасдир, лекин қарши ҳужумларимиз тобора кескинлашмоқда. Биринчи рақамда тўп суриб якуни аламли мағлубият бўладиган шоу намойиш этгандан кўра, бироз пастроқ темпдаги ёқимли натижа учун ўйнаяпмиз. Футбол шундай нарса. Нимагадир эришиш учун, нимадандир воз кечиш талаб этилади.

Мураббий энди келганида, кўпчилик бу фалсафани ҳазм қилишга қийналди. Доим, юқори темпда ўйнаган жамоани бир деганда 5 ҳимоячи билан ҳаракатланишга ўтказиш қийин. Бу қарор (иккинчи рақамда футбол ўйнаши) кимларгадир қўрқоқликдек кўрингани рост. Шунга қарамай, футбол ривожланмоқда. Ҳозир, бўйидан баланд сакраш учун ўз кучига тўғри баҳо бериш энг муҳими. Таркибиздаги асосий юлдуз Элдорми? Демак, Ўзбекистон Шомуродовдан максимал фойдаланиши учун ҳам ўйинни ҳимоядан қуришга мажбур. Бундай олиб қаралса, мантиқан тўғри ҳам.

Таркибдаги тезкор йигитлар чуқур ҳимояланадиган рақиблар билан ўйинда бесамар. Агар рақиб ҳам тезкор бўладиган бўлса, юқори темпда жисмоний ҳолат бизга бироз панд бериши мумкин. Ҳар қанақасига олиб қаралса ҳам, бугунги 3 марказий ҳимоячи билан ўйнаётган терма жамоанинг тарғиб этаётган фалсафаси футболимиздаги муаммоларга энг яхши ечим бўлиб кўринмоқда.

Тез орада Осиё Кубоги мусобақаси старт олади. Унга қадар қайсар мураббий барча футболчиларимизга энди ҳеч нарса аввалгидек бўлмаслигини тўлақонли тушунтира олса, натижалар янада яхшиланиши аниқ. Тўғри, муаммолар, камчиликлар бор. Шунга қарамай, Сречко терма жамоа бош мураббий лавозимига жуда тез ва яхши киришиб кетгани ҳам факт.

Вазиятга реал баҳо бериш лозим бўлса, бугунги футболимизни даражаси шу. Уни борича қабул қилиш, қўлдаги ресурслардан максимал фойда чиқаришга интилиш лозим. Катанец шундай ҳам қиляпти. Кимгадир ёқса ҳам, ёқмаса ҳам.

Яҳёхўжа Улуғхўжаев