Stol tennisi. Litsenzion musobaqada ishtirok etadigan O‘zbekiston terma jamoasi tarkibi e’lon qilindi

Joriy yilning 17-19 may kunlari poytaxtimiz Toshkent shahrida stol tennisi bo‘yicha Parij-2024 yozgi Olimpiya o‘yinlariga yo‘llanma beruvchi litsenzion musobaqa bo‘lib o‘tadi. Qayd etish lozimki, Markaziy Osiyo mintaqasi vakillari o‘rtasida kechadigan bahslar erkaklar va ayollar o‘rtasida yakkalik yo‘nalishida tashkil etilib, turnirda faqat oltin medalni qo‘lga kiritgan 1 nafar erkak va 1 nafar ayol sportchi Olimpiada litsenziyasini qo‘lga kiritadi.

Ushbu musobaqada ishtirok etish uchun O‘zbekiston, Qozog‘iston, Eron, Turkmaniston va Qirg‘izistondan 18 nafar sportchi ro‘yxatdan o‘tkagan. Litsenzion turnirda terma jamoamiz sharafini quyidagi sportchilar himoya qiladi:

Erkaklar: Zohid Kenjaev va Shohruh Iskandarov;
Ayollar: Marhabo Magdieva va Rozalina Xadjaeva.

Ma’lumot uchun, Zohid Kenjaev O‘zbekiston tarixida Olimpiadada ishtirok etgan birinchi va hozircha yagona sportchi hisoblanadi. U 2016 yil Rio-de-Janeyro shahrida bo‘lib o‘tgan o‘yinlarda yurtimiz sharafini himoya qilgan. Tarkibdan o‘rin olgan Shohruh Iskandarov, Marhabo Magdieva hamda Rozalina Xadjaeva ham ko‘p karra O‘zbekiston chempioni va bir qator xalqaro musobaqalar g‘olib-sovrindorlari hisoblanadi.

Baxtiyor Toshtemirov.