Суперклуб “Реал”нинг бирданига уч футболчисини оляпти

Туриннинг “Ювентус” клуби келаси мавсум олдидан таркибида жиддий ўзгаришларга қўл уришни режалаштирмоқда. Италия гранди бу ишни “Реал” футболчилари ёрдамида амалга оширмоқчи.

Италия матбуотининг ёзишича, туринликлар раҳбарияти “Реал” клуби мутасаддилари билан бир нечта футболчи бўйича музокара ўтказишга тайёргарлик кўрмоқда.

“Ювентус” биринчи навбатда Браим Диас ва Гонсало Гарсияни ўз сафига қўшиб олишни кўзлаяпти.

Хусусан, италияликлар 21 ёшли Гонсало Гарсияни “Манчестер Сити”дан келиши кутилаётган Бернарду Силвага муқобил вариант сифатида кўрмоқда. Клуб испан ҳужумчисини сотиб олиш ҳуқуқи билан қайта харид қилиш банди орқали трансфер қилишни режалаштиряпти. Бу схема аввал Альваро Мората трансферида ҳам қўлланган эди.

Шунингдек, “Ювентус” хўжайинлари “Қироллик клуби” нишонида турган Кенан Йилдизни келишув доирасидаги вариантларга киритиб, уни сотиб олиш бўйича мадридликларга устувор ҳуқуқ беришга тайёр экани айтилмоқда.

Бундан ташқари, туринликлар Давид Алабани ҳам эркин агент сифатида қўлга киритиш устида иш олиб бормоқда. Манбага кўра, ҳимоячига расмий таклиф ҳам юборилган.