Суперкубок учун чипталар қачондан сотувга чиқарилиши маълум

"Нефтчи" ва "Пахтакор" клублари Суперлига 3-туридан ўрин олган ўз учрашувларини 10 март куни ўтказади. Шундан кейин ҳар икки клуб Андижон мезбонлик қиладиган Суперкубок беллашуви учун тайёргарлик бошлайди. 

ЎзПФЛ матбуот хизматининг ёзишича, Лига байроғи остида ўтказиладиган Суперкубок ўйини учун чипталар 11 март куни сотувга чиқади. Айни вақтда Лига ҳар икки клуб вакиллари билан музокара олиб бораётган бўлиб, уларнинг таклифи билан айрим секторлар учун чипталар нафақат Андижон, балки Фарғона ва Тошкент шаҳарларида ҳам йўлга қўйилиши мумкин.

Фарғоналик мухлисларга 1—15 секторлар учун чипталар харид қилиш, тошкентлик мухлисларга эса 19-32 (1А) секторларга эътибор қаратиш тавсия этилади. 16—18 секторлар учун чипталар, шунингдек, клубларнинг таклифидан келиб чиқиб, улар учун ажратилган бошқа айрим секторлар учун чипталар "Бобур арена" кассаларида сотилиши режалаштирилган.