Суперлига: "Динамо" - "Навбаҳор" учрашуви чипталари сотувда!

"Динамо" - "Навбаҳор" учрашуви чипталари сотувга чиқарилди. Бу ҳақда клуб матбуот хизмати хабар берди. 

"Барча мухлислар интиқлик билан кутган янги футбол мавсуми старт олмоқда! 

Вадим Абрамов мураббийлигидаги «Динамо» жамоаси Суперлига-2026 1-турининг марказий ўйинида 28 феврал, шанба куни Темур Кападзе бошчилигидаги «Навбаҳор»ни қабул қилади. Самарқандда ўтадиган учрашувга қизиқиш жуда юқори. 

Бугун, 25 феврал соат 15:00дан бошлаб «Динамо» - «Навбаҳор» учрашуви чипталари сотуви бошланади. Бир ўйин учун оддий тоифадаги чипта нархи ўзгармаган – 25 минг сўм. Мухлисларга қулай бўлиши учун оддий тоифадаги чиптанинг йиллик абонемент кўринишидагиси ҳам сотувда мавжуд. Нархи – 400 минг сўм этиб белгиланган. Йиллик чиптани сотиб олган мухлислар 2026 йил давомида Суперлига ва кубок ўйинларига айнан шу абонемент билан кириш ҳуқуқига эга бўлишади.

Бу йилдан эътиборан стадион маъмурияти томонидан марказий трибунанинг VIP (960 минг сўм) ва CIP (820 минг сўм) сектордаги чипталар йиллик абонемент кўринишида сотувга чиқарилиб, ҳозирга келиб сотиб бўлинган. Қолган исталган секторлар учун бир ўйинлик оддий чипталар – 25 минг сўм, йиллик абонемент эса 400 минг сўмдан сотилиши бошланади. Касса бугун соат 18:00гача, қолган кунлари ҳам соат 09:00дан 18:00гача ишлайди. Чипталар сотуви ўйин куни ҳам давом этади", - дейилади хабарда.