Суперлига учун қуръа ташланади ёхуд кимгадир фарқи бор, кимгадир фарқи йўқ

1 февраль куни Ўзбекистон Суперлигасининг 2025 йилги мавсумга қуръа ташланади. Айни пайтда футболимизга алоқадорларнинг ва мухлисларнинг энг кутаётган жараёни ҳам айнан қуръадир. Айниқса, мураббийлар учун ҳам бу ўзига яраша муҳим ҳисобланади. Илк турни ким қаерда ва кимга қарши бошлашига қараб мураббийлар кейинги режаларини тузиб чиқадилар.

Шунингдек, бу йил чемпионатимизда ўйинлар сони ҳам ўз-ўзидан ортади. Суперлигада иштирокчилар сони 14 тадан 16 тага оширилди ва шунга яраша ҳис-ҳаяжонга бой учрашувларимиз ҳам кўпаяди. Кўпчиликни эса илк турда қайси рақибга дуч келиши қизиқтириши шубҳасиз. Ахир аввалини қандай бошласанг, қолгани ҳам шундай давом этиши катта эҳтимол. Шунинг учун клубларимизга мавсумни муваффақиятли бошлаб олиш жуда муҳим аҳамият касб этади.

Доимгидек чемпионатимиз фаворитлари бор. “Насаф”, “Пахтакор”, “Нефтчи” сингари жамоалар таркибларини сақлаб қолиш билан бирга сезиларли даражада кучайтирмоқдалар. 1-турни мана шундай рақибларга қарши бошлашни истамайдиганлар ва аксинча етакчиларга қарши ўйин билан бошлашни хоҳлайдиганлар ҳам топилади.

Шунингдек, Про лигадан Суперлигага “Машъал”, “Бухоро”, “Қўқон-1912”, “Шўртан” ва “Хоразм” клублари йўл олдилар. Ҳали қуйи лигадан элитага бирданига 5 та жамоанинг йўл олиши кузатилмаганди. Биласиз, дастлабки икки ўрин эгаси тўғридан-тўғри йўл олди. 3 ва 4-ўрин эгалари эса плей-офф орқали, 6-ўринни қўлга киритган “Хоразм” бўлса, “Металлург”нинг ўрнини эгаллади ва бунда ҳам ЎзПФЛ тўлиқ Регламентга таянган ҳолда иш кўрди.

Про лигадан Суперлигага йўл олган 5 та жамоа ўз таркибларини имкониятидан келиб чиққан ҳолда кучайтиришга ва тўлдиришга ҳаракат қилмоқдалар. Балки бошқа жамоалар Суперлиганинг айнан про лигадан чиққан клубларга қарши ўйинлар билан бошлашни исташлари ҳам бор гап. Лекин унутмаслик керакки, кўпинча бундай ҳолатда кутилмаган натижалар қайд этилади.

Аслини олганда, Суперлигадаги жамоа ҳар бир иштирокчи билан албатта ўйнаб чиқади. Шунинг фонида шундай мураббийлар борки, уларга илк турда қайси клубнинг рўбаро келиши аҳамиятсиз. Масалан, “Андижон” бош мураббийи Александр Хомяковга биринчи турда ким рақиб бўлиши мутлақо қизиқ эмас. Бизнингча, кўпчилик мураббийларга ҳам шундай. Чунки боя айтганимиздек, вақти келиб барча рақиблар билан барибир ўйналади. Муҳими эса, мураббий жамоасини чемпионатига ҳар томонлама пухта тайёрлашдан иборат.

ЎзПФЛ эса қуръа олдидан қуйидаги хабарни эълон қилди:

“Суперлига мавсуми 7 март куни старт олиши режалаштирилган. Лига унинг тўлиқ иштирокчилари ва клублар қайси стадиондан қай тартибда фойдаланиши масаласида иш олиб боришига тўғри келди.

Мусобақага қуръа ташлаш маросими 1 февраль куни 18:00 да старт олади ва у “Футбол ТВ” орқали жонли эфирга олиб чиқилади.

Қуръа жараёнида Лига қуйидаги кетма-кетликни инобатга олади:

а) мавсум стартини ўз майдонида бошламаслиги, бироқ кейинчалик бошқа стадионга кўчиб ўтиши катта эҳтимол бўлган клублар;

б) бир стадиондан фойдаланиши кўзда тутилган ва шундан келиб чиқиб жуфтлик ҳосил қилган клублар;

д) жуфтлик ҳосил қилмаган клублар.

Лига мутахассислари қуръа ва унинг қолган масалаларини жонли эфирда тушунтириб бериши кўзда тутилган”.

Демак, янги футбол мавсуми олдидан қуръа ташлашни кузатамиз. Бунинг ўзига яраша ҳаяжони ҳам бор. Ҳамма омадли бўлишини истайди, лекин унутмаслик керакки, қуръани кўзи кўр, деган гап ҳам бор!