Суперлигада ёзда амалга оширилган энг яхши трансферлар ТОП-10

4-30 июль кунлари Ўзбекистонда ёзги трансфер ойнаси даврида клублар олди-сотдиларни амалга оширди.

“2022 йилги мавсумда Ўзбекистон Профессионал футбол лигаси томонидан ўтказиладиган мусобақалар регламенти”да футбол клуби ёзги трансфер ойнасида 5 нафардан ортиқ бўлмаган янги футболчини рўйхатдан ўтказиши мумкин экани кўрсатиб ўтилган. Бунда клуб томонидан ижарага олинаётган футболчи ҳам янги ўйинчи сифатида қайд этилади.

Мана шуларни инобатга олган ҳолда клублар трансферларга эътибор қаратди.

Шу пайтга қадар клубларимиз ёзги трансферлар даврида бу қадар фаол  бўлганини эслолмаймиз.

Биз шу йили ёзда клубларимиз ўз сафига қўшиб олган энг яхши футболчилар ўнталигини тузиб чиқдик. Шуни айтиб ўтиш керакки, трансферларда хориждан келган янги ўйинчиларни инобатга олмадик. Ҳали улар борасида фикр билдиришга бироз эрта.

10.Марат Бикмаев “Сўғдиёна”дан “Динамо”га

Йил бошида Марат Бикмаев “Сўғдиёна” сафига қўшилганди. Ҳужумчининг жиззахликлар сафидаги ўйини очилмади, фаолияти кўнгилдагидек кечмади. Аммо унинг Самарқанд жамоасига кўчиб ўтиши катта воқелик. Балки ёшни инобатга олсак, бу у қадар катта трансфермасдир. Лекин чемпионликка эришган, катта ўйинларни кўрган Марат “Динамо” учун фойдали трансфер дейишимиз мумкин.

9.Муҳаммаданас Ҳасанов “Локомотив”дан АГМКга

“Локомотив” ярим ҳимоячиси Муҳаммаданас Ҳасанов ярим мавсумдан сўнг яна жамоасини ўзгартирди. Жорий йил бошида Қўқондан пойтахтга йўл олган Ҳасанов, ёзда Тошкент вилояти жамоаси сафига қўшилди. Муҳаммаанас АГМКнинг чап қанотини кучайтириш учун олиб келинди.

8.Виталий Денисов “Балтика” (Россия)дан “Сўғдиёна”га

Виталий Денисов катта ном. Ўзбекистон миллий терма жамоасида узоқ йиллар мазмунли фаолияти билан ёдда қолган. Охирги пайтларда жамоасиз эркин агент мақомидаги чап қанот ҳимоячиси “Сўғдиёна”дан қўниб топди. Агар ёш панд бериб қўймаса, тажриба ўз сўзини айтиш эҳтимоли юқори.

7.Аброр Исмоилов “Пахтакор”дан “Нефтчи”га

“Нефтчи” мавсум бошида “Пахтакор”дан Аброр Исмоиловни ижарага олди. Ёзда эса унинг трансферини қўлга киритди. “Пахтакор” ярим ҳимоясида рақобат юқорилиги учун Исмоиловга жой тегмасди, лекин “Нефтчи”да унга ўрин бор. Бўлганда ҳам муқим ўрин дейиш мумкин. Аброр таянч ва ҳужумкор ярим ҳимояда тўп тепишини инобатга олсак, фарғоналиклар учун ажойиб трансфер бўлди, дейиш мумкин.

6.Ислом Кенжабоев “Навбаҳор”дан “Қизилқум”га

Хориждаги фаолиятидан сўнг бир муддат “Қизилқум”да, кейин “Навбаҳор”да кўриниш берди. Наманганликлар сафида Самвел Бабаян ярим ҳимоячиларни шу қадар қалаштириб ташлаганки, Кенжабоев асосий таркибга кира олмади. Ўтган мақвсум ярмида навоийликлар сафида яхши ўйинлари билан ёдда қолган футболчи яна “Қизилқум”га қайтди. У ўзи билган ва ўйнаб кўрган клубга борганини инобатга олсак, Исломнинг ўйинлари мувафақиятли чиқишига умид қилиш мумкин.

5.Элгужа Григалашвили “Навбаҳор”дан “Динамо”га

“Навбаҳорда” грузиялик легионернинг фаолияти бир қарашда яхши давом этаётганди. Фақатгина Наманагандаги учрашувларнинг бирида мухлисларга қарата қилган ҳаракати унинг оёғига болта урди. Юртимиздаги энг кўп ва жамоага таъсир ўтказа оладиган мухлисларга қарата қилинган эътироз у ерда кечирилмаслиги кундек равшан эди.

Самвел Бабаян Элгужани гарчи асосий таркибга қўяётган бўлса ҳам бу қилмишига кўз юма олмади. “Навбаҳор” мухлисларига унинг қилмишини оқлагандан кўра мураббий янги трансферларни амалга ошириб қўя қолди.

Лекин Григалашвили борган клуб турнир жадвалида охирги ўринда эканлигини инобатга олсак, унинг жамоа етакчиси бўлишига шубҳа қилмаймиз.

4.Жасур Яхшибоев “Легия” (Польша)дан “Навбаҳор”га

Хориждаги фаолиятининг охирги паллалари кўнгилдагидек чиқмаган Жасур Яхшибоев юртимизга қайтди. Қайтганда ҳам ўз олдига жиддий мақсад қўйган клубга.

Яхшибоевнинг мухлислари етарли. У стабил ўйнамаса ҳам номи чиққан футболчилардан. Қолаверса, унинг энг катта ютуғи ЕЧЛда “Реал”га гол урган. Жасурга хорижда тўплаган тажрибаси “Навбаҳор”га қанотлар ва ҳужумда ас қотиши мумкин.

3.Жасур Жалолиддинов “Қайрат” (Қозоғистон)дан “Локомотив”

Ўзбекистон U-23 терма жамоаси сардори Қозоғистон клубидаги ўзгаришлардан сўнг собиқ жамоасига қайтди. Яқиндагина Осиё чемпионатида порлаган футболчи “Локомотив”га жуда пайтида келди.

“Термирйўлчилар” сафида ижодкор ўйинчи йўқ эди. Энди эса бор.

2.Достон Ҳамдамов “Ал-Сайлия” (Қатар)дан “Пахтакор”га

“Пахтакор”дан вақтинча кетиб, яна шу жамоага келадиган футболчи. Содиқ. Унинг хорижга йўл олиши ҳам осон, қайтиши ҳам.

Лекин шуниси аниқки, Ҳамдамов “Пахтакор”да ҳар қандай мураббийнинг услубига мослаша олади. Шунинг учун Достоннинг иккинчи даврани “Пахтакор”да бошлашини фақатгина жамоага фойда келтиради, дейиш мумкин.

1.Диёр Туропов “Локомотив”дан “Навбаҳор”га

Ёзда амалга оширилган энг яхши ва жамоа ҳамда мураббийга мос трансфер. Диёр универсал футболчи. Ортга ҳам, олдинга ҳам ўйнай олади. Курашувчан, жангчи. Самвел Бабаян хоҳлаган харид.

Унинг ҳарактери (майдондаги) қаттиқ. Шу боисдан “лочинлар” мураббийи уни жамоада кўришни истади. Сўзсиз жамоа ёзда таркибга қўшиб олган энг яхши футболчи, дейиш мумкин.

Бекзод ИСАЕВ тайёрлади