Суперлигамизда бирорта ғалаба қозона олмаган мутахассисни "Спартак"да кутишаётганига нима дейсиз?!

Тажрибали Виктор Кумиковнинг “Андижон”даги фаолияти муваффақиятсиз чиққани ўзи учун ҳам ажабланарли туюлган бўлса керак. Чунки у клубдаги мураббийлик иши давомида бирорта ўйинда ғалаба қозона олмади ва шу ҳолатда “Андижон”ни тарк этди.

Аммо Виктор Балютовичнинг хизматига ҳамон жиддий клублардан қизиқишлар бўлиб турибди. Бу борада гап кетганда унга Нальчикнинг “Спартак” клуби таклиф билан чиқди. Кумиков sports.uz мухбирининг “Андижон”даги фаолияти ва клубни тарк этиши билан боғлиқ ҳақидаги саволларига жавоб берар экан, янги таклиф борасида ҳам тўхталиб ўтди.

- Виктор Балютович, “Андижон” клубидан кетишни ўзингиз хоҳладингизми?

- Ҳа, “Андижон” клубини тарк этишни ўзим хоҳладим. Чунки жамоада кўп нарса ўзгариб кетди: таъсисчилар, раҳбарият...шу боис у ердан ўз ихтиёрим билан кетишни хоҳладим. Кайфиятим эса жойида.

- Клубда янги раҳбарият иш бошлади ва энди молиявий муаммолар камайиши кутилмоқда. “Андижон”да қолишингиз ҳам мумкинмиди? Ёки улар билан фикрингиз бир жойдан чиқмадими?

- Жамоада нафақат раҳбарият, балки ривожланиш йўли ҳам ўзгарди. Улар олдингидан фарқли равишда йўналишни, стратегияни, умуман ҳамма нарсани ўзгартириб юборишни режалаштирдилар. Хусусан, таркибда кўпроқ ёшлар ўйнашини ҳам ҳал қилишга киришдилар. Қисқаси, “Андижон”даги ҳамма шарт-шароитлар тубдан ўзгариб кета бошлади. Шу сабаб кетдим.

- Афсуски, клуб тарихида бирорта ҳам ўйинда ғалаба қозона олмаган мураббийга айландингиз ва бу ҳол сизнинг фаолиятингизда ҳам илк бор юз берди. Бу хусусида нима дея оласиз?

- Менинг вазифам жамоани жарликдан олиб чиқиб кетиш эди. Биз бунга ҳаракат қилдик. Агар клубнинг ўйинини кузатган бўлсангиз, биз деярли барча рақиблар билан тенгма-тенг курашдик. Жумладан, чемпионат мусобақасининг дастлабки тўртлигидаги жамоаларга қарши ўйинларимиз ҳам шиддатли кечди. Устига-устак, учрашувларимизни кўпинча сафарда ўтказишимизга ҳам тўғри келди. Бу ҳолат ҳам якуний натижаларга ўз таъсирини ўтказмасдан қолмади. Футболда эса уйда қадрдон деворлар ҳам ёрдам беради, деган гап бежизга айтилмаган. “Андижон” эса ўз уйида саноқли ўйинларни ўтказди холос. Нима бўлган тақдирда ҳам айтишим мумкинки, биз қўлимиздан келганича ҳаракат қилдик. Ким ҳам майдонга ютқазишни хоҳлаб чиқарди?! Шунинг баробарида таркибда кўплаб ўзгаришларни амалга оширдик. Умуман айтганда, қўлимиздан келганча тўп сурдик. Боз устига пандемия шароитида машғулотларни ҳам тўлақонли ўтказишнинг иложи бўлгани йўқ. Шу вазият ҳам кўп нарсани ўзгартириб юборди.

- Сизнингча, “Андижон”ни иккинчи даврада нималар кутмоқда? Клуб Суперлигада қолишга қодирми?

- Уларда аниқ муайян вазифанинг ўзи йўқ. Юқоридагилар бизга клубни сақлаб қолиш кераклиги ҳақида гапиришди холос. Агар мана шундай вазифа олдиндан қўйилганида юқоридагилар ҳамма ишни бутунлай бошқача йўналишда олиб борган бўлишарди.

- “Андижон” бош мураббийликка Даврон Файзиев билан Александр Хомяковнинг номзодини кўриб чиқди. Аммо музокаралар ўхшамади. Бундан хабарингиз борми?

- Хомяков рад жавобини берибди. Лекин буни муҳокама қилишни хоҳламаган бўлардим. Чунки клубдан кетиб бўлдим. Бу энди уларнинг муаммоси. Бош мураббий лавозимига кимни хоҳлашса ўшани тайинлашаверади. Хомяковнинг рад жавобини берганига келсак, афтидан у аниқ вазифа қўйилмагани туфайли таклифни қабул қилмаган кўринади. Ўзини ҳурмат қиладиган ҳар қандай мураббий молиявий шарт-шароити яхши бўлмаган жамоада ишлашни истамайди. Бундай вазиятда аниқ вазифалар қўйилиши ҳам даргумон. Бундай жамоаларга фақат эндигина мураббийликни бошлаган мутахассислар келишлари мумкин холос. Ўз навбатида мана шундай мутахассислар шартнома талабларини ўзгартиришга ҳаракат қилишлари мақсадга мувофиқ бўларди.

- Кейинги режаларингиз қандай?

- Ҳозирча менинг олдимдаги аниқ режа – бу уйимга, Россияга қайтиб кетишдан иборат. Бори шу холос.

- Айтишларича, Нальчикнинг “Спартак” клубини бошқаришингиз мумкин экан. Шу гаплар ростми?

- Ҳа, шундай таклиф билан менга чиқишди. Буни 100 фоиз ишонч билан айта оламан. Бунга шубҳаланмасангиз ҳам бўлади.

- “Спартак-Нальчик” сиз ишлаган собиқ клубингиз шундайми?

- Албатта, шундай, адашмадингиз. Гарчи таклиф 100 фоизли бўлса ҳам ҳали ҳеч нарса ҳал бўлгани йўқ. Аввало боришим, “Спартак” раҳбарлари билан ҳаммасини муҳокама қилиб олишим керак. Шундан кейин бу каби саволлларга тўлиқ жавоб беришим мумкин.