Суперюлдузларимиз, камарга кўз тиккан нокаутчилардан эҳтиёт бўлинг!

3 апрель куни Тошкентдаги “Ҳумо” аренасида ташкил этиладиган профессионал бокс кечасида Ўзбекистоннинг энг кучли чарм қўлқоп усталари кучли рақибларга қарши жанг қилади. Мусобақа дастуридан ўрин олган жангларнинг учтасида ўртага турли даражадаги чемпионлик камарлари тикилган. Бу мақоламизни чемпионлик жангларида қатнашадиган боксчиларга бағишлаймиз.

Профессионал бокс кечасининг асосий жангида Муроджон Аҳмадалиев WBA ва IBF йўналишларидаги жаҳон чемпионлиги камарини илк маротаба ҳимоя қилади.

Муроджон ҳаваскор боксда катта тажриба тўплаган. Ўз вақтида Осиё чемпиони ва вице-чемпиони, жаҳон чемпионати кумуш медаль соҳиби, Олимпия ўйинлари совриндори бўлган Аҳмадалиев ҳаваскор боксчилар ҳавас қиладиган барча турнирларда шоҳсупага кўтарилган. Наманганлик боксчи ҳаваскорлар ўртасида 47 та ғалаба ва 17 мағлубият қайд этган.

Ярим профессионал мусобақа – Жаҳон бокс серияларида бешта жангдан учтасида зафар қучиб, икки бор рақибга имкониятни бой берган.

Профессионал боксга ўтганидан кейин рекорд даражадаги қисқа муддатда икки чемпионлик камар эгасига айланди. Бунинг учун наманганлик боксчига саккизта жанг керак бўлди. Барчасида қўли баланд келган ҳамюртимиз, олтита беллашувда рақибларини нокаут қилди.

Унинг икки камарига даъвогарлик қилаётган япониялик Риосуке Иваса профессионал боксга ҳамюртимиздан ўн йил олдин қадам қўйган. 27 марта ғолиб чиққан боксчи ҳисобида учта мағлубият бор. Япон боксчиси ўзи муваффақият қозонган беллашувлардан 17 тасида рақибини муддатидан олдин таслим қилган.

Иваса уч йил олдин филиппинлик Эрнесто Саулонгг қарши жангда IBF жаҳон чемпионлик камарига эга чиққан эди. Бироқ, ўша йилнинг ўзида, биринчи ҳимоя жангида ирландиялик Теренсе Жон Дохенига ютқазиб қўйди.

Мағлубият нималигини билмай келаётган Дохени битта муваффақиятли ҳимоядан сўнг, 2019 йилда АҚШда ташкил этилган WBA ва IBF чемпионлик камарлари учун жангда мезбонлар вакили Даниэль Романга ютқазди.

Роман икки камарини Муроджон Аҳмадалиевдан ҳимоя қилган жанг 2020 йилнинг январида АҚШда ўтказилди. Аҳмадалиев кучли рақибни очколар ҳисобида енгиб, Даниэль Романдан IBF  камарига қўшиб, WBA чемпионлигини ҳам тортиб олди.

Мана орадан бир йилдан ортиқроқ вақт ўтиб, Аҳмадалиев илк ҳимоя жангини ўтказмоқда. Иваса ҳам ўзи соғинган камарни қайтариш учун бор имкониятини ишга солади.

Ҳаваскорлар ўртасида жаҳон ва қитъа чемпиони, Олимпиада финалчиси бўлганидан кейин юлдуз даражасига кўтарилган Шаҳрам Ғиёсов профессионал ўртасида ўнта жангда ғолиб чиқиб, WBA International камари учун курашиш имконига эга бўлди.

Шаҳрам ўн раундлик жангда Мексика вакили Патрисио Лопез Морено билан куч синашади. Рақиб ўта хавфли. Чунки Морено ўзи зафар қучган 28 та баҳсдан 20 тасида оппонентларини нокаутга учратган. Аксарият жангларини биринчи раунддаёқ ҳал қилиб қўйган. Тўртта мағлубиятидан иккитаси минтақавий чемпионлик камарлари учун бўлган жангларда қайд этилган.

Олимпиада чемпиони Ҳасанбой Дўсматов учинчи профессионал жангидаёқ минтақавий чемпионлик камарини қўлга киритиш имконига эга.  Енгил вазнда WBA International камари учун бўладиган 10 раундлик  учрашувда ҳамюртимиз танзаниялик Муҳсин Кизота билан куч синашади. Африкалик боксчи 11 та ғалаба ва иккита мағлубият қайд этган. Мухлисларимиз бу жангда Ҳасанбойнинг имкониятини юқори баҳоламоқда.

Боксчиларимизга жангларида омад тилаймиз!