Танқидга учраётган Мбаппе “Реал”дан қанча маош оляпти?

“Реал”нинг янги футболчиси Килиан Мбаппе клубдан қанча маош олаётгани маълум бўлди. Умумий ҳисобда франциялик ҳужумчи Испания чемпионатида энг катта маблағ топаётган ўйинчилардан бири ҳисобланади.

25 ёшли тўпурарнинг айни пайтда топаётган маблағи бонуслар билан бирга бир мавсум учун қарийб 36 миллион еврони ташкил қилмоқда.

Бу ҳақда таниқли журналист Рамон Альварес де Мон ижтимоий тармоқлардаги саҳифасида маълум қилди.

“Қироллик клуби” катта маош оладиган ўйинчилардан бир нечтасининг кетгани туфайли маошларга кетаётган харажатларни қисқартиришга эришди. Хусусан, фаолиятини якунлаган Тони Кроос 20 миллион, бошқа клубга ўтган Начо Фернандес 10 миллион ва Хоселу 2 миллион евро олаётган эди.

Шунингдек, клуб билан ҳамкорлигини бир йилга узайтирган Лука Модричнинг маоши 24 миллион евродан тенг ярмига қисқарди.