Ташқарида қиш, майдонда эса қайноқ ҳароратдаги ўйин ёхуд "Хоразм" ва "Бухоро" учун финал!

Бу йилги чемпионатимиз якунига етди, лекин тўлиқ эмас. Айрим клубларимиз учун ҳамон давом этмоқда. 10 декабрь санасида “Бухоро” ҳамда “Хоразм” жамоалари плей-оффнинг иккинчи раундида тўқнашишади ва ютгани лигада қолади.

Хабарингиз бор, плей-оффнинг дастлабки раундида “Бухоро” ҳам, “Хоразм” ҳам пенальтилар сериясида “Машъал” билан “Қўқон-1912”га мағлуб бўлишди. Ғолиблар лигада қолишди ва ютқазганларда эса яна бир имконият бор ва бу имконият эртанги ўйинда юз беради.

Энг қизиғи, плей-оффнинг иккинчи раундида ютқазган жамоага лигада қолиш учун яна имконият бўлади ва бу охиргиси. Мағлуб жамоа Нукусда “Арал”га қарши сўнгги баҳсини ўтказади ва ютгани Суперлигада, ютқазгани про лигада ўйнайди. Ҳозирги қиш фаслида ҳеч ким ортиқча харажат қилиб, олис Нукусга бориб, ҳал қилувчи ўйинни ўйнашни истамаслиги бор гап. Шундоқ ҳам “Бухоро” ва “Хоразм” илк босқичда имкониятни бой берди ва дам олишларсиз яна ишлашда давом этишяпти. Иккала клуб ҳам лигада жон сақлаб қолиш масаласини 10 декабрь куни ҳал қилиб олишмоқчи.

Ўзбекистон Кубоги финалига чиқиб, қаҳрамонлик кўрсатишига оз қолган бухороликлар бу ёқда ҳам про лигага тушиб кетишига бир баҳя қоляпти. Майдонда қаттиқ жанг кечса керак. “Хоразм” ҳам Суперлигада қолиш масаласини ушбу учрашувда ҳал қилиш учун бор кучини ташлайди. Шу сабабли қиш фаслида биз қайноқ ҳароратдаги ўйинни кўрсак ажаб эмас.

Жорий йилги Суперлигада “Бухоро” ва “Хоразм” биринчи ва иккинчи даврада тўқнаш келишди. Дастлаб “Хоразм” мезбонлигидаги учрашувда 1:4 ҳисоби қайд этилган бўлиб, “Бухоро” ўйинни ўз фойдасига ҳал қилган. Иккинчи даврадаги учрашувда эса 1:1 натижаси кузатилган. Қизиғи, иккаласида ҳам жамоалар стадиони тайёр бўлмагани сабабли бошқа ареналардан фойдаланишган.

Умумий ҳисобда ушбу клублар чемпионатимиз тарихида 16 маротаба куч синашишган. “Бухоро”да 11, “Хоразм”да эса 4 ғалаба бор. Фақат бир марта дуранг қайд этилган ва бу натижа боя таъкидлаганимиздек, ушбу мавсумнинг иккинчи даврасида кузатилди. Тўплар нисбати 37\17 бухороликлар фойдасига.

“Хоразм” охирги марта “Бухоро” устидан 2009 йилда ғалаба қозонган. Ўшанда 1:0 ҳисоби қайд этилган. Статистика бўйича урганчликлар 16 йил илгари  “Бухоро”ни ютган. Бу сафарги баҳс олдингиларидан кескин фарқ қилади. Чунки ўртага Суперлига чиптаси тикилган. Бўлажак учрашувда дуранг кўрмаймиз, кимдир ютиши шарт! Хўш, кимнинг кўчасида байрам бўларкин?