Тчуамени: “Бутун жамоа бўлажак учрашувга тайёр” (Тўлиқ матбуот анжумани)

Хабарингиз бор, УЕФА Чемпионлар лигаси плей-офф босқичида Мадриднинг икки клуби тўқнаш келди. Илк учрашувда "қаймоқранглилар" Родриго ва Браим Диаснинг голлари эвазига 2:1 ҳисобида зафар қучди. Жавоб беллашувидан аввал эса Тчуамени ва Карло Анчелотти матбуот анжуманида иштирок этиб, бўлажак учрашув ҳақида ўз фикрлари билан ўртоқлашишди. 

“Бутун жамоа эртанги кунга тайёр. Бу қийин бўлади, лекин биз боримизни берамиз. 
 
Ҳуштак? Албатта, ўйин давомида ҳуштакларни эшитдим, лекин ҳар бир ўйиннинг ўз тарихи бор. Ҳуштакларга қарамай, ўшанда яхши ўйнаганман. Бу энг муҳим нарса. Бундай нарсаларга доимий эътибор беришнинг ҳожати йўқ. 


 
Марказий ҳимоячи ва таянч зонасида ўйнаяпман? Бу иккита мутлақо бошқа иш. Ҳимояда бироз кўпроқ вақтингиз бор, лекин диққатни жамлаш ҳам қийинроқ, чунки сизда тўп йўқ бўлади. 
 
Менинг мақсадим ҳар доим ўйиннинг барча жабҳаларида яхшиланиш. Эртага "Атлетико" жуда агрессив ўйнайди, лекин биз нима қилишимиз кераклигини биламиз. Биз дуранг учун ўйнамоқчи эмасмиз, биз ғалаба қозонишни истаймиз. 
 
Энг муҳими, диққатни жамлаш. Учрашув давомида нима бўлиши муҳим эмас. Одамлар нима дейишига аҳамият бермаслик керак. Бугун яхшисан, эртага йўқ. Сиз диққатни жамлашингиз ва табассум билан давом этишингиз керак. Ҳар доим кўп гаплар бўлади. 


 
Килиан Мбаппе Мадридда бахтли, у аллақачон кўп гол урди ва бундан ҳам кўпроқ гол ура олади. 
 
Эртанги кайфиятингиз? Максимал ва ижобий, чунки бизда феноменал таркиб, ажойиб мураббий ва дунёдаги энг яхши мухлислар бор” – дея таъриф бериб ўтди, франциялик хавбек. 
 
Маълумот ўрнида, Мадрид дербиси бугун Тошкент вақти билан 01:00 да старт олиши режалаштирилган.