Тен Ҳаг: "Мен Мактоминайнинг кетишига қарши эдим"
Эрик тен Хаг «Манчестер Юнайтед» раҳбариятини розилигисиз Скотт Мактоминайни «Наполи»га сотиб юборгани учун ваъдада турмаганликда айблади.
«Манчестер Юнайтед»нинг собиқ бош мураббийи Эрик тен Хаг клуб раҳбарияти Скотт Мактоминайни унинг розилигисиз сотиб юборганини маълум қилди.
Мураббийнинг сўзларига кўра, у шотландиялик яримҳимоячини жамоада қолдиришни қатъий сўраган.
«Жуда хафа бўлдим. Биз олдиндан келишиб олгандик, мен эса Скотт Мактоминайни сотмасликларини илтимос қилган эдим. Чунки жамоада гол урадиган футболчилар етарли эмасди, Скотт эса доим натижа кўрсатаётганди. Унинг қонида “Манчестер Юнайтед” бор. Мендан сўрашганда ҳам уни сотишга қарши эдим. Лекин охир-оқибат барибир уни сотиб юборишди», — дея тен Хагнинг сўзларини келтиради The Athletic нашри.
Скотт Мактоминай «Манчестер Юнайтед» тарбияланувчиси ҳисобланади. У 2024 йилда «Наполи» клубига ўтди.
Эрик тен Хаг 2022 йилдан 2024 йилгача «қизил иблислар»ни бошқарган. Унинг қўл остида клуб икки марта соврин қўлга киритган.
Изоҳлар (0)