Терма жамоамиз дарвозасини ишғол қилган швед, аргентиналик хавбеклар ва 21 ёшли бразилиялик! «Банияс»да қандай легионерлар тўп суради?

SPORTS.uz Қаршининг “Насаф“ жамоаси билан Осиё чемпионлар лигаси йўлланмаси учун бўладиган баҳсда майдонга чиқадиган БАА клуби ҳақидаги энг қизиқарли маълумотлар билан ўртоқлашади.

Бош мураббий: Даниэль Исаела

Ҳали 50 ёшга тўлмаган бўлса ҳам, анчагина тажрибали бўлган Даниэль Рўзиқул Бердиевнинг бугунги баҳсдаги асосий рақиби саналади. Фаолияти давомидаги энг ёрқин ғалабаси сифатида “Астра“ билан Руминия кубоги ва суперкубогида зафар қучганини кўрсатишимиз мумкин. Клублар ҳақида сўз борар экан, айтарли ғалабаларга эришганича йўқ. Унинг жамоалари доимо ҳужумкор футбол намойиш этган. Бугунги “Банияс“ ҳам айнан шу аспектда кучли. Аммо Осиё майдонларидаги баҳслар тажрибаси йўқ. Бош мураббий бу камчиликни анча кучли легионерларга суянган таркиби билан тўлдиришга уриниб кўради. Хўш, “Насаф“нинг бугунги рақиби сафида қандай легионерлар тўп суради?

Ярим ҳимоячи: Николас Хименес (Аргентина)

2021 йилнинг 1 июль санасида эркин агент мақомида Абу Даби шаҳри клуби билан шартнома имзолган Хименесни алоҳида эътироф этиш лозим. "Transfermarkt" портали берган маълумотларга суянадиган бўлсак, бугунги кунда у “Банияс“ таркибидаги энг қиммат футболчи саналади. Хименес “Нуево Чикаго“ клуби тарбияланувчиси. Қаҳрамонимиз фаолияти давомида фақат Аргентина жамоаларида тўп тепган. Ярим ҳимоячи асосан, майдон марказида тўп суради. Шунингдек, керакли паллада плеймейкерга ҳам айланиши мумкин. Яхши тезлик ва ажойиб сўнгги узатмага эга. Бир сўз билан айтганда, бугунги “Банияс“нинг асосий ижрочиларидан бири.

Марказий ҳимоячи: Саша Ивакович (Сербия/Хорватия)

Энди навбат оғир артиллерияга. Саша Сербиянинг энг машҳур жамоаларидан бири - Белграднинг “Партизан“ академиясида таҳсил олган. Бугунги кунда уни трансфермаркт портали 850 минг еврога баҳолаган. Эътиборлиси шундаки, Ивакович эндигина 28 ёшни қарши олди. Араб клубларида бу ёшдаги легионерларни учратишни авваллари имкони бўлмаган. Ҳозир эса БАА жамоалари асосан, майдонда маҳаллий футболчилардан яққол ажралиб туришга қодирларгагина шартнома таклиф қилмоқда. Ивакович классик марказий ҳимоячи амплуасида тўп тепади. Баланд бўйли (192 см) ва жисмонан бақувват болқонлик йигит “Банияс“нинг стандартлардаги асосий қуроли десак, адашмаган бўламиз. У фаолияти давомида Словения ва Исроил сингари мамлакат чемпионатларида тўп тепган. “Марибор“ билан мамлакат чемпионлигига эга бўлган. У бир вақтнинг ўзида Сербия ва Хорватия фуқаролигига эга. “Насаф“га қарши ўйинда айнан у Ҳусайн Норчаевни персонал қўриқлаши кутилмоқда.

Ярим ҳимоячи: Гастон Алварес Суарес (Аргентина)

“Банияс“нинг энг асосий легионери - Гастон Суареас билан танишинг. У ҳам Ивакович билан тенгдош. "Transfermarkt" портали уни қўлга киритишни истаган жамоа 2,8 миллион евро сарфлаши керак, деб ҳисоблайди. Хименес сингари Гастон ҳам асосан майдон марказида ҳаракат қилади. Лекин деярли майдондаги қора ишларни бажармайди. У фаолиятини Аргентинанинг камтарин жамоаларида бошлаган. Карьерасини Европада давом эттиришни жуда истаганига қарамай, “Арсенал Саранди“дан уёғига ўта олмаган. 2020 йилдан БАА клуби шарафини ҳимоя қилиб келмоқда. Ярим ҳимояда тўп суришига қарамай, голлар киритишни хуш кўради. Кучли зарбага эга. “Насаф“ билан ўйинни асосий таркибда бошлаши тахмин қилинмоқда.

Ҳужумчи: Исаак Телен (Швеция)

Швеция футболи ўзининг совуққон марказий ҳужумчилари билан футбол оламига яхши таниш. Хенрик Ларссон, Йохан Элмандер ва Златан Ибрагимовичлар шулар жумласидан. Исаак ҳам ушбу юрт ҳужумчиларига ҳос бўлган ўйин манерасига эга. Жисмонан бақувват, баланд бўйли (189 см) ва ҳужум чоғида жой танлашга уста. Қаҳрамонимизнинг карьерасида кўпчиликка яхши таниш бўлган бир нечта жамоалар номини учратиш мумкин. “Байер“, “Бордо“, “Андерлехт“, “Малмьо“, “Касимпаша“ сингари клублар шарафини ҳимоя қилган форвард бугунги “Банияс“нинг асосий страйкери. 2021 йилнинг 11 сентябрь санасида Бирлашган Араб Амирликларига кўчиб ўтган қаҳрамонимиз "Transfermarkt" портали томонидан 2,7 миллион еврога баҳоланган. “Банияс“ устози Исаакни баъзан захирадан ўйинга қўшади. Бу жамоаси учун сўнгги дақиқаларда иккинчи қаватда яхшигина устунлик бериши мумкин. Швед ҳозир 29 ёшда. Унда Европанинг номдор клубларидан таклифлар бўлишига қарамай, “Банияс“да қолишга қарор қилди. У қисқа муддат ичида маҳаллий ишқибозларнинг ёқимтойига айланган. “Аждарлар“ билан ўйинда “Банияс“нинг чинакам қуролига айланиши мумкин.

Ҳимоячи: Жоао Виктор Вансер (Бразилия)

Араб клубларига хос бўлмаган легионер. Эндигина 21 ёшга қадам қўйган Жоао “Крузейро“ клуби тарбияланувчиси саналади. 2019 йилнинг 1 июль санасида Абу Дабига кўчиб ўтган футболчи аллақачон “Банияс“ мухлислари учун “маҳаллий“ футболчига айланиб бўлган. Чап қанотнинг исталган позициясини беркитишга қодир футболчи кўпроқ ҳимояда кўриниш беради. Керакли паллада анча олдинроқ ўтиб, вингерга ҳам айланиши мумкин. У “Банияс“нинг қанотлардаги устунлигини таъминлаб берувчи асосий куч саналади.

Я . У