Тезкор: Ўзбекистоннинг рақиби мундиалга тайёргарликни бекор қилди

2026 йилги жаҳон чемпионатининг гуруҳ босқичида Ўзбекистон, Португалия ва Колумбия футболчилари билан бир квартетдан жой олган Конго Демократик Республикаси терма жамоаси кутилмаган баёнот билан чиқди.

Терма жамоанинг расмий вакили Жерри Калемо африкаликлар “Жаҳон чемпионати – 2026” олдидан мамлакат ичида ўтказилиши режалаштирилган уч кунлик йиғин ва мухлислар билан хайрлашув тадбири Эбола вируси тарқалиши сабаб бекор қилинганини маълум қилди.

- Тайёргарлик уч босқичда ўтиши керак эди: Конго пойтахти Киншасада мухлислар билан хайрлашув; Бельгия ва Испаниядаги йиғин доирасида Дания ҳамда Чилига қарши иккита ўртоқлик учрашуви; учинчи босқич 11 июндан АҚШнинг Хьюстон шаҳрида бошланиши режа қилинган. Фақат Киншасадаги босқич бекор қилинди, - деди Калемо ESPN нашрига.

Аввалроқ, Жаҳон соғлиқни сақлаш ташкилоти Конго Демократик Республикаси ва Угандадаги Эбола касаллиги тарқалишини халқаро аҳамиятга эга фавқулодда ҳолат, деб эълон қилган эди.