Тимбер Жаҳон чемпионатини ўтказиб юборишидан афсусда

Нидерландия терма жамоаси ва "Арсенал" ҳимоячиси Юрриен Тимбер жароҳати сабаб Жаҳон чемпионатида иштирок эта олмаслиги ҳақида фикр билдирди.

Футболчида чов соҳасидан жароҳат аниқланган бўлиб, у мундиални ўтказиб юборади.

"Мен Жаҳон чемпионатида ўйнай олмаслигим ва мамлакатим шарафини ҳимоя қилолмаслигимдан жуда қаттиқ хафаман. Бундай имкониятни жароҳат туфайли бой беришни қабул қилиш мен учун осон эмас.

Ишонаманки, Аллоҳ мен учун ҳозир кўраётганимдан ҳам буюкроқ режани тайёрлаб қўйган. Терма жамоамиз йигитларига омад тилайман. Мамлакатимиз сизлар билан фахрланадиган натижага эришинглар", — деб ёзди Тимбер ижтимоий тармоқда.

Маълумот учун, Нидерландия терма жамоаси Жаҳон чемпионати гуруҳ босқичида Япония, Швеция ва Тунис билан бир гуруҳдан ўрин олган.

"Учар голландлар" мундиалдаги илк учрашувини 14 июнь куни АҚШнинг Арлингтон шаҳрида Японияга қарши ўтказади.