Тимур Кападзе: "Ҳар бир ўйин футболчиларимизни кучайтиради"

“Бунёдкор” – “Олимпик” (1:5) учрашувидан кейин меҳмонлар бош мураббийи Тимур Кападзе ўз фикрлари билан ўртоқлашди.

- Жамоамни ғалаба билан табриклайман. Бугун яхши ўйин кўрсатдик. “Бунёдкор” ҳам яхши жамоа. Биламиз, иқтидорли футболчиларга эга. Олдинги учрашувларини кўрдик, чиройли ўйин кўрсатишган. Жиддий тайёргарлик кўрдик, осон беллашув бўлмаслигини билардик. Олдинги баҳсларда фойдаланилмаган имкониятлардан бугун анча самарали фойдаландик. Натижа биз учун жуда яхши. Балки “Бунёдкор” учун катта шокдир. Биз яхши ишладик. Нафақат бугун, ҳар бир учрашувда яхши ҳаракат қиляпмиз. Фақат вазиятлардан фойдалана олмаётганимиз туфайли ғалаба қозона олмаётгандик.

Рақибни ўрганиб чиққандик. Ҳимояда ва ҳужумда қандай ўйин кўрсатишларини билган ҳолда тайёргарлик кўрдик. Биз деярли имконият бермадик. Заиф нуқталаридан ва камчиликларидан фойдаланиб, ютиб кетдик.

Олдимизда катта мақсадлар турибди. Бу жамоалар тайёргарлик кўришимиз учун замин яратяпти. Бундай жамоаларга қарши ўйнаш ва тажриба орттириш жуда муҳим. Ҳеч кимдан чўчишмаяпти. “Сурхон”ни ҳисобга олмаганда, деярли барча етакчиларга қарши ўйнадик. Менимча, яхши таассурот қолдиряпмиз. Ўйиндан-ўйинга футболчиларим тажриба тўплаяпти. Кейинги учрашувда бундан ҳам яхши ўйин кўрсатишга ҳаракат қиламиз. Бунгача дуранг ва мағлубият бўлди, аммо ўйинимиз бор эди ва йигитлар ўсаётганди. Шу боис хотиржам эдим, бизга фақат ғалаба етишмаётганди холос. Ҳар бир ўйин йигитларимизни кучайтиради.