Тимур Кападзе: "Мен учун терма жамоа бегона эмас. Бизга вазифа берилди ва буни бажаришимиз керак!"

ЎФА биринчи вице-президенти Равшан Ирматов ҳамда Ўзбекистон миллий терма жамоаси бош мураббийи Тимур Кападзе Доҳага етиб келиб, жамоа билан учрашгани ҳақида хабар берилган эди. "Оқ бўрилар"нинг янги устози бўлажак ўйинлар ва режалар ҳақида ўз фикрларини билдирди.

"Биринчи навбатда Сречко Катанецга соғлик тилайман. Ҳаммамиз Сречкони охиригача олиб боришини ҳоҳлардик. Аммо бу қўлимизда эмас, соғлик биринчи ўринда. Менга келадиган бўлсак, кеча раҳбарият томонида мени номзодим тасдиқланди. Мен учун терма жамоа бегона эмас. Бу либосни кўп йиллар давомида ҳимоя қилганмиз. Бундан ташқари, ҳам мураббий, ҳам ёрдамчи мураббий бўлиб ишлаганман. Шунинг учун, терма жамоа ҳар доим мен учун устун турган. 

Биз аскармиз. Бизга вазифа берилди ва буни бажаришимиз керак. Мана, келдик ва биринчи кундан киришиб кетдик. Мураббийлар штаби билан ҳам, футболчилар билан ҳам гаплашдик. Ушбу йиғин ажойиб ўтади. Янги футболчилар бор ва уларни ҳам синовдан ўтказамиз.

Бизда ФИФА кунларида муҳим иккита учрашув бор ва унга яхши тайёргарлик кўрамиз. Оз муддат қолди ва энг асосийси болалар соғ, формада келишсин. Олдимизга ЖЧга чиқиш вазифаси қўйилган. Бу вазифани бажаришга ҳаракат қиламиз. Буёғига ҳар бир ўйин муҳим, босими катта ва қийин бўлади. 

Ўйлайманки, ЖЧга чиқишга футболчиларнинг маҳорати ҳам, кучи ҳам, қобилияти ҳам етади. Мухлисларимизнинг қўллаб-қувватлаши ҳам муҳим роль ўйнайди. Биргаликда биз катта кучга айланамиз", - деди Кападзе.