Тимур Кападзе: "Қаердадир камчиликларимиз кўзга ташланди"

“Насаф” – “Олимпик” (2:0) ўртасидаги учрашувдан кейин меҳмонлар бош мураббийи Тимур Кападзе матбуот анжуманида иштирок этди.

- “Насаф” жамоасини ғалаба билан табриклайман. Қийин учрашув бўлди. Ноқулай об-ҳаво иккала жамоа яхши ўйин кўрсатиши учун тўсқинлик қилди. Анчадан бери ўйин тонусимиз бўлмаганлиги бугун билинди. “Насаф” Осиё Чемпионлар лигасида иккита ўйин ўтказгани учун биздан кўра яхшироқ спорт формасида экани билиниб турибди. Чунки биз охирги ўйинимизни Туркиядаги йиғинда ўтказдик. Келганимиздан кейин об-ҳаво сабабли ўзимиз истаган ўйинларда ўйнай олмадик. Айтганимдек, бугунги учрашувда ҳам ҳаво ўз таъсирини кўрсатди. Умуман олганда, яхши учрашув бўлди. Иккала жамоа ҳам курашди. Кейинги ўйинга тайёргарлик кўрамиз. Футболчиларимиз яхши ҳаракат қилишди. Ҳа, қаердадир камчиликлар кўзга ташланди. Лекин борини бериб курашишди.

- Ҳисобдан қониқдингизми?

- Албатта, қониқмадим. Мағлубият ҳеч кимга ёқмайди. Ғалаба учун келгандик. Қандай голлар ўтказиб юборганимизни кўриб чиқамиз. Биринчи голни балки маҳорат эвазига уришди. Учрашувдан тўлиқ хулоса чиқарамиз, кейинги баҳсга тайёргарлик кўрамиз.

- “Олимпик”да иккита марказий ҳимоячи жароҳати сабабли ўйнамади. Уларни йўқлиги мағлубиятга сабаб бўлдими?

-  Албатта, йўқотишлар бор. Нафақат иккита ҳимоячимиз, ҳужумчимиз ҳам бу учрашувда етишмади. Уларни ўрнида бошқа йигитлар яхши ўйин намойиш этишди. Бу мағлубиятга уларни йўқлигини сабаб қилмайман. Албатта, улар бўлганида янада яхшироқ бўларди.

- Акбар Абдурасулов қизил карточка олди. Буни нима билан изоҳлаган бўлардингиз?

- Рақиб ҳужумини тўхтатишда охирги вазиятда шунга мажбур бўлди. Иккала карточка ҳам бир хил ҳолатда кўрсатилди. Бу бўладиган нарса. Балки, позицияни тўғри танлаганида бундай бўлмаслиги ҳам мумкин эди. Қарши ҳужумга чиқиб кетаётганида ва иккинчисида рақиб бирга-бир вазиятга эга бўлаётганида огоҳлантирилди. Бу вазиятларни кўриб чиқамиз. Бу фақат ўйиндаги эпизодлар.