Тимур Кападзе: "Рақибни қандай жамоалиги ҳақида маълумот топишга қийналдик"

“Навбаҳор” Ўзбекистон Кубогини “Қорақалпоғистон ФА” жамоасига қарши ўйин билан бошлади ва ўта йирик – 9:0 ҳисобида рақибини тор-мор келтирди. Учрашувдан сўнг “Навбаҳор” бош мураббийи Тимур Кападзе матбуот анжуманида қуйидаги фикрларни билдирди.

- Ғалаба билан табриклайман. Ўйлайманки, бу ўйин академия тарбияланувчилари учун фойдали бўлди. Гарчи ҳисоб ўта йирик бўлишига қарамасдан барибир тажриба қўлга киритишди. Биз учун машғулот ўйинидек ўтди. Кейинги учрашувга тайёргарлик кўрамиз. Кўрганингиздек, ҳаммага имконият бериляпти. Про лига ёки биринчи лига бўлсин, Суперлига жамоаларига қарши жиддий курашишяпти. Шунинг учун ҳар бир ўйинга жиддий қараяпмиз.

- Академия жамоасига қарши ўйинга тайёргарлик кўриш жараёнида рақибни қандай жамоалиги ҳақида маълумот топишга қийналдик. Академия тарбияланувчилари бўлганидан кейин кўпроқ ёшлар бўлади. Шуни инобатга олсак, уларда кўпроқ ҳаяжон сезилди. Яхши ўйин билан бугунги ўйинни ҳал қилдик. Ундан ҳам кўп вазиятларимиз бўлди. Про лига, биринчи лига жамоалари учун Суперлига клубларига қарши ўйинларда ўзини кўрсатишга мотивация катта бўлади. Шунинг учун ҳаракат қилишади. Ҳаммани ўзига яраша мақсади бор. Натижаларни кўриб ҳайрон қолдим, аммо ўйинларни кўрмадим. Шуниси билан ҳам қизиқ.

- Ҳар ўйиндан кейин доимий равишда тикланиш бўлади, бу нарсага урғу қаратамиз. Ҳар хил жароҳатлар бор. Футболда тўқнашувлар кўп бўлади. Худога шукр, бу томонлама ҳаммаси жойида. Европа билан солиштириш қийин. Об-ҳавода ҳам катта роль ўйнайди. Биз ҳам Россия ёки бошқа жойга кўп борардик. Ҳавоси, намлиги, қуруқлиги ёки шунга ўхшаш ҳолати таъсир қилади. Европадан жамоалар бу ерга келса, балки унчалик темп кўрсата олмаслиги мумкин. Жисмоний жиҳатдан ҳам жамоалар анча кучайишди. Бизда ҳам йилдан-йилга кучайяпти.

- Яхши ният қилайлик, финалгача борайлик, Кубокни ютайлик. Олдимизда кўп ўйинлар бор ва кўп ишлашимиз керак. Кейинги учрашувга тайёргарлик кўришимиз керак. “ФарДУ” билан “Хоразм” ҳам яхши жамоалар. Про лига билан Суперлига ўртасида сезиларли даражада катта фарқ йўқ. Ҳар бир учрашувга жиддий қаралса ҳаммаси жойида бўлади.